Die Kensington-paleis het Vrydag twee pragfoto’s gedeel wat vanjaar onderskeidelik op prins Harry en sy nuwe vrou en prins William en sy gesin se Kerskaartjies sal pryk.
Prins Harry en sy vrou, Meghan Markle, wat op 19 Mei vanjaar getroud is, het ʼn foto van hul glanstroue by Frogmore House vir hul Kerskaartjie gebruik. Op die foto, wat deur Chris Allerton geneem is, kan gesien word hoe die pasgetroude paartjie staan en kyk na ʼn skouspelagtige vuurwerkvertoning.
Na verwagting sal daar volgende jaar ʼn pienkvoet saam met die hertog en hertogin van Sussex op hul Kerskaartjie verskyn aangesien hulle hul eersteling rondom April 2019 verwag.
Prins William en Kate Middleton spog egter met ʼn voltallige kroos op húl Kerskaartjie. Op die foto, wat deur Matt Porteous by Anmer Hall geneem is, sit William en Kate saam met prins George (5), prinses Charlotte (3) en prins Louis (7 maande) met die pragtige kleure van herfs om hulle sigbaar.
Albei die foto’s is reeds duisende kere op sosiale media gedeel.
Daily Mail berig die twee broers en hul onderskeie gesinne sal vanjaar Kersfees saam met koningin Elizabeth by Sandringham House in Norfolk, Engeland, deurbring soos die gebruik is. Dit kom te midde van berigte dat Meghan en Kate nie juis ooghare vir mekaar het nie, gerugte wat Buckingham-paleis ʼn paar weke gelede ontken het.
Dis ni nuuswaardig ni
Dis pragtig. So goed om ‘n gelukkige gesin te sien.
Ferdi, ek lag bietjie vir jou. Jy het die berig oopgemaak.