(Foto: Lower Moss Wood Nature Reserve & Wildlife Hospital/Facebook)
ʼn Diereliefhebber van Engeland het ʼn hele nag lank omgesien na dit wat sy vir ʼn siek babakrimpvarkie aangesien het.
Toe die diertjie die hele nag lank nie beweeg of enigiets geëet het nie, het sy dit na die Lower Moss Wood Nature Reserve & Wildlife Hospital in Cheshire geneem.
“Die dame het met ʼn boks ingekom. Sy het gesê sy het die krimpvarkie op die sypaadjie opgemerk en dit was koud toe sy dit opgetel het,” het Janet Kotze, bestuurder van die hospitaal, gesê, berig die New York Post.
Kotze was besorg, omdat dit baie vroeg in die seisoen is vir babakrimpvarkies.
“Ek het die boks by haar gevat en dit na die ondersoekkamer geneem. Ek het die boks oopgemaak en ek kon nie glo wat ek sien nie. Dit was beslis nie ʼn krimpvarkie nie. Ek het gedink dit is dalk een of ander tipe wollerige diertjie.”
Toe Kotze egter die bolletjie wol optel, het sy besef dit is eintlik net die tossel van ʼn wolmus.
Kotze sê die vrou was baie skaam en wou weet of die bestuurder ʼn grap maak toe sy met die tossel vorendag kom.
“Siestog, sy wou net goedhartig wees.”
Die vrou het glo nie ordentlik na die tossel gekyk nie. Sy het die “diertjie” gou opgetel en het nooit van nader ondersoek ingestel nie. Sy het nie opgelet dat dit nie enige ore, oë, bene of enige ander dier-eienskappe het nie.
Die gewig van die tossel het ook nie die vrou agterdogtig gemaak nie – selfs al was dit een van die eerste dinge wat Kotze se aandag getrek het.
*Kennedy News and Media het die hospitaal met dekking oor die storie gehelp.
