Gedig: Die son loop agter wolke deur

Argieffoto (Foto: Myriams-Fotos, Pixabay)

André Letoit (Koos Kombuis) (Geb. 1954)

die son loop agter wolke deur
mense drink koffie met warm slukderms
terwyl hul sokkies onder hul broekspype sweet
oë draai links en regs afhangende van ligging van meisies
– mooiweermeisies met sambrele soos dun ooglede
toegeknip teen die gure weer –
die son loop agter wolke deur.

die son loop agter wolke deur
ʼn poedel inspekteer bene en boomwortels
terwyl sy miesies onder haar rooi kapsel
oor die straat wip-wip. ek verlang na jou
hier in die lawaaierige stilte van die straatkafee
en roer my koeldrank met my strooitjie oor en weer
die son loop agter wolke deur

die son loop agter wolke deur
sy strale slaan teen lugkastele vas
van engele of geeste. hiervan weet ons
aardmense min. ons weet net van koffiedrink
en rooi verkeersligte en poskantore. maar die son
is hoog geleë; hy weet niks van wat hier gebeur.
die son loop agter wolke deur

die son loop agter wolke deur
my hande is oor my voorkop gevou
en jou afwesigheid stu in my bors.
ek wil wegvlieg saam met die son
oor wit berge en blou dale waar niemand
voel nie; hy steur hom nie aan wat hier gebeur
die son loop agter wolke deur.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

Driekie Grobler ·

Net omdat iemand bekend is, maak dit hom nie noodwendig n digter nie.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.