Deur Frank Karsten
Bitcoin (Foto: Engin Akyurt/ Pixabay)
Die Oostenrykse ekonoom Ludwig von Mises het eens gesê: “Wie ook al vir meer regeringsingryping vra, vra uiteindelik vir meer dwang en minder vryheid”.
Bitcoin is nie staatsgeld nie, maar vryheidsgeld. As jy Bitcoin besit, is dit kriptografies beveilig teen diefstal en roof, en sonder jou samewerking kan niemand dit vat nie – nie eers die regering nie. Hierdie digitale geldeenheid het ook geen tussenganger, soos ʼn bank nie, en daarom kan niemand ʼn transaksie blokkeer nie.
Die finansiële vryhede van burgers word oor die hele wêreld geskend. In feitlik elke land word mense gedwing om die nasionale geldeenheid te gebruik, wat altyd depresieer soos wat regerings entoesiasties meer geld druk.
Maar die probleem is nog groter. Toe Ciprus in 2013 deur ʼn finansiële krisis gegaan het, het die regering besluit om rekeninghouers ʼn sogenaamde “haarsnit” te gee. Die bates van almal met meer as R2 000 000 is gesnoei. Dankie Cipriote vir julle harde werk!
Verlede jaar het Libanese banke die bates van sekere kliënte bevries. Dit is gedoen in opdrag van die regering, wat massiewe inflasie veroorsaak en mense probeer keer het om hul dollar-rekeninge te gebruik. Verskeie ontstoke rekeninghouers het selfs ʼn gewapende roof van hul eie bank gepleeg om hul swaarverdiende spaargeld in die hande te kry.
Venezuela, wat soos ʼn rot in die ekonomiese drein afloop, gun burgers ook min finansiële vryheid. Sedert 2015 het meer as 6 miljoen mense uit die land gevlug. Diegene wat op dié manier die ellende wil vryspring, loop die gevaar om deur doeanebeamptes by die grens beroof te word. Maar Bitcoin kan ʼn oplossing bied. Omdat dit onsigbaar is en niks weeg nie, is dit maklik om veilig oor die grens te kry.
Toe die fluitjieblaser-webwerf Wikileaks Amerikaanse skandale in 2010 blootgelê het, het politici geëis dat banke die skenkings blokkeer. Gelukkig het skenkers na Bitcoin oorgeskakel. Dit het geblyk ʼn uitkoms te wees, want sewe jaar later het stigter Julian Assange vrolik berig dat hy byna 50 000% opbrengs gemaak het.
Baie regerings hou daarvan om hul opponente finansieel te keer. In Rusland is die opposisieleier Alexei Navalny van sy bankrekeninge afgesny. Die Kanadese regering het verlede jaar 200 rekeninge gevries wat verband hou met die Trucker-protes teen die Covid-19-maatreëls. Bitcoin het geblyk ʼn reddingsboei te wees.
Die Britse banke speel ongelukkig ook politieke speletjies, want baie het geweier om die regse Reclaim Party as klant te aanvaar. Selfs die gewilde Britse podsending Triggernometry, wat teenstrydige sienings uitdruk, het skielik ʼn boodskap ontvang dat die bank die rekening sonder duidelike rede gesluit het.
Nederland neem ook gelukkig deel. Die ING het byvoorbeeld die Virus Truth-rekening in 2021 geblokkeer. In 2008 het die Wet op die Voorkoming van Geldwassery en Terroristefinansiering in werking getree. Nederlandse banke moet dus hul kliënte soos ʼn Big Brother dophou.
Die verbruikersprogram Radar het onlangs gewys hoe selfs gehoorsame bankkliënte briewe ontvang het. Dit het onder meer ʼn verduideliking geëis oor “verdagte” betalings aan supermarkte en ʼn energieverskaffer. Was hierdie vir tonne geld? Nee, dit het net miljoene rande behels, in transaksies versprei oor ʼn hele jaar.
En dit alles lyk soos kinderspeletjies in vergelyking met die gevaar genaamd CBDC (Central Bank Digital Currency). As regerings hul nasionale geldeenhede ten volle digitaal maak, sal hulle op hul burgers se finansies kan spioeneer en dit beperk en beïnvloed soos nog nooit tevore nie. Diegene wat te veel ongesonde kos koop, kan geblokkeer word. Diegene wat nie by die aandklokreël hou nie, kan dalk nie meer hul geld spandeer nie.
Jy stel dalk nie belang in politiek nie, maar politiek stel altyd in jou belang, en nie altyd op ʼn positiewe manier nie. Onthou dat die vryhede wat jy vandag geniet, afhang van die aktiwiteite van die mense en organisasies wat hulle verdedig. As hulle nie meer skenkings kan ontvang nie, sal jou kleinkinders nie meer die vryhede ken wat jy eens gehad het nie.
Finansiële vryheid kan nie as vanselfsprekend aanvaar word nie. Aangesien Bitcoin neutraal en oop is, kan dit help om vryheid te beskerm. Hopelik kan dit ʼn versekeringspolis wees teen ʼn Orwelliaanse toekoms.
- Frank Karsten is die skrywer van The Discrimination Myth (discriminationmyth.com) en mede-outeur van The Democracy Beyond (beyonddemocracy.net).
Die CBDC (Central Bank Digital Currency) kom heel waarskynlik. Volgens Ernst Wolff is ook lande soos Rusland besig om voorbereidings te tref om hulle nasionale geld digitaal te maak. Die sogenaamde kompetisie tussen BRICS en die Dollor trek ons aandag van hierdie ontwikkeling af.