Deur Frank Karsten
Bitcoin (Foto: WorldSpectrum/ Pixabay)
“Die verslae van my dood is erg oordrewe,” het die Amerikaanse skrywer Mark Twain geskerts toe sulke gerugte oor hom opduik.
So is dit met Bitcoin. Dit is komies om te sien hoe finansiële kenners, koerante en ekonome die ondergang van hierdie digitale geldeenheid vir jare voorspel het. Maar Bitcoin staan meer gereeld uit die dood op as die Bybelse Lasarus.
Ek het ook groot besware en twyfel gehad. Kritici beweer dit is windhandel (spekulatiewe handel), ʼn bohaai, piramideskema en bedrogspul. Maar in watter mate is dit waar?
Bitcoin is nie ʼn piramideskema nie, want dit het geen leiers nie. ʼn Piramideskema vereis ʼn sentrale leier of organisasie wat opbrengs aan bestaande deelnemers betaal deur betalings van nuwe deelnemers in te win.
Jy mag dalk dink dat Bitcoin windhandel is, want daar is niks daaragter nie. Benewens geld kan goud en silwer ook in juweliersware en elektronika gebruik word, maar die nie-monetêre waarde van Bitcoin is inderdaad nul. Dit voldoen egter aan ʼn werklike behoefte, naamlik as ʼn veilige alternatief vir verskillende nasionale geldeenhede – soos die rand, dollar en euro – wat al hoe meer korrup raak.
Hulle nie-monetêre waarde is ook nul, want sentrale bankiers en politici tik net mooi getalle in en skep nuwe geld uit die lug. Dit is vroeër vervalsing genoem, nou word dit netjies “kwantitatiewe verruiming” genoem.
Die waarde van Bitcoin is nie in die string betekenislose karakters wat elke Bitcoin opmaak nie, maar in die kriptografiese sekuriteit van almal se digitale eiendom. Dit lê in die oop en neutrale aard van die netwerk. Dit lê in die sekerheid dat Bitcoin harde geld is, want die beperkte toename in die aantal munte word in die rekenaarkode aangeteken.
Alhoewel dit gewigloos en onsigbaar is, moet jy onthou dat ʼn rekeningkundige program ook niks weeg nie, maar steeds baie werd kan wees. Die Bitcoin-netwerk is as’t ware ʼn globale rekeningkundige program.
Is Bitcoin dalk net ʼn bohaai, ʼn tydelike waansin? Kritici vergelyk die sukses daarvan met die Nederlandse tulpemanie in die sewentiende eeu. Nederland was destyds onder die bekoring van tulpbolle. Maar daardie waansin het net drie jaar geduur en eensklaps heeltemal ineengestort, terwyl Bitcoin reeds veertien jaar oud is en besig is om momentum te kry.
Weens die sukses van Bitcoin het ʼn bohaai ontstaan rondom alternatiewe kriptogeldeenhede – die duisende altcoins. Maar die meeste van hulle voer ʼn yl bestaan.
Tog geniet Bitcoin steeds sy eie bohaai. Toe Elon Musk Bitcoin vir miljarde gekoop het, het dit tot hoë verwagtinge en ʼn skerp prysstyging gelei. Daar is natuurlik ook baie mense wat dit koop sonder om dit te verstaan of te wil gebruik. Vir hulle is dit spekulasie. Maar ja, daar is ook spekulasie in kommoditeite, aandele en vaste eiendom.
Die sterk posisie van Bitcoin as ʼn kriptogeldeenheid is te danke aan die sogenaamde netwerkeffek. Enigeen kan die sagteware kopieer en hul eie munt begin, maar dan het jy nie die netwerk van miljoene gebruikers, ontwikkelaars en masjiene nie. As jy Facebook se sagteware kopieer, kan jy nie verwag om ʼn miljardêr soos Mark Zuckerberg te word nie. Dit sal moeilik wees om gebruikers te vind, omdat jou vriende steeds op Facebook is.
Teoreties kan die waarde van Bitcoin tot nul daal, maar daar is min rede om te glo dit sal. Die netwerk van rekenaars gons lekker, die aantal gebruikers is hoër as ooit, en die prys is steeds indrukwekkend in vergelyking met geldeenhede soos die euro en dollar.
Bitcoin is presies die teenoorgestelde van ʼn bedrogspul. Dit is heeltemal deursigtig, geen persoon is in beheer nie, die kode is publiek en die kasboek kan deur enigiemand bekyk word. Enigeen kan deelneem aan betalings, transaksies nagaan of nuwe munte ontgin. Bitcoin is die mees etiese geld wat daar is, en gelukkig kry al hoe meer mense dit.
Kyk nou net, iets positiefs oor Bitcoin. Hoe minder vryheid ons in die toekoms gaan hê, hoe meer gaan Bitcoin gebruik word en werd wees. Anders as ‘n bank, besit niemand dit nie en niemand kan dit keer nie.
Klink vir my baie eerder na verteerde kos oppad buitewereld toe as mens dit nie kan keer nie
Baie mense is al gevang met Bitcoin “schemes “,ek hou maar by wat Dawie Roodt en oorlede Mike Shusler altyd gesê het as dit te goed om waar te wees dan is dit en moet die gevaarligte aangaan.
Die probleem is nie die Bitcoin nie, maar die “schemes”. Hoeveel mense is al gevang met effekte-beurs “schemes”? Is dit die effektebeurs se skuld, of die schemers?
Ek het geluister na Dawie Roodt in 2010 en het nie my R1000 gebruik om Bitcoin te koop nie. Daar was duiselik gese dat dit net n bubble is wat sou bars. Ek sou daai tyd 555 bitcoins kon koop met R1000. Dit sou vandag 295Miljoen werd gewees het en tydens die Februarie 2021 bulrun op R555Miljoen gestaan het. Bitcoin was R1.80 elk gewees in 2010 en is nou R530425.00 elk. Maar ek dink die krypto wat gaan oorneem wat nou goedkoop per coin is, is Worldcoin.
Ek het al probeer – maar ek verstaan Bitcoin nie. So ek bly maar weg.
Dis maklik…..Gee my jou hard verdiende geld, ek hou dit vir jou en laat dit groei teen die spoed van lig dan kan jy in n japtrap aftree sonder enige bekommernise (Glo jy die aanbod? Want dis hoe dit werk.)
PS: Na jy AL jou geld aan my betaal het korrespondeer ons slegs per hand geskrewe pos.
“Bitcoin is presies die teenoorgestelde van ʼn bedrogspul. Dit is heeltemal deursigtig, geen persoon is in beheer nie, die kode is publiek en die kasboek kan deur enigiemand bekyk word. ”
Ek weet nie waarvan jy praat nie, SwartBees, maar jy praat nie van Bitcoin nie.
Laai die LUNO app af op jou foon en volg die instruksies.
Ek is al 5 jaar aktief met crypto handel. Ek glo dit gaan die digitale geldeenheid van die toekoms wees. Gebruik slegs fondse wat jy nie einde van die maand weer moet gebruik uit nood vir brood en melk nie. Jy moet bereid wees om te sien hoe jou belegging se waarde in een dag halveer en weer oor 2 maande verdubbel. Gretigheid en vrees wanneer die mark val is waar mense dom besluite neem. Van laas week af kan jy nou by enige Pick & Pay aankope doen met jou digitale beurs.
Nie n piramide skema nie…..gmfff! Wat is dit anders as n skelm skema? Julle wil nou kom sê n skaap is n scrambler.
Vrot melk het ook op n tyd baie geld gemaak, vandag gaan dit reguit drein toe en stink nog steeds vir die wat dit noukeurig opgepas het.
Daar is niks wat by ‘n regte stukkie goud en ‘n paar blouwit klippies kom nie. ‘n Paar note in ‘n boksie sal ook nie my hart breek nie.
Dit bestaan nou al vir n dekade en in die dekade kon niemand nog dink aan iets buiten spekulasie waarvoor jy Bitcoin kan gebruik nie. Dit is punteloos.