Beskerm jou beursie op Swart Vrydag deur dié wenke te volg

Foto: JESHOOTScom/Pixabay.com

Voor jy besluit om jou hele jaar se salaris én bonus op Swart Vrydag-winskopies te bestee – wat ʼn goeie dag is om jou Kersfees-inkopies ook sommer op een slag af te handel – is daar heelwat dinge wat verbruikers in gedagte moet hou wanneer hulle hul kredietkaarte afstof.

“Dis uiters belangrik om voorsiening te maak vir die geld wat jy gaan bestee, want jy kan net dalk te veel bestee. Moenie gedruk voel om elke item wat jy sien te koop nie omdat jy dan ook goed gaan koop wat jy dalk nie nodig het nie,” waarsku Susan Steward, woordvoerder van Budget Insurance.

Om te keer dat jy wel oor jou bestedingsdrempel trap, stel Steward die volgende maatreëls voor.

Onthou om ʼn begroting op te stel

As jy ʼn begroting het, sê Steward, word jou besteding in toom gehou. “As jy van plan is om geskenke te koop, stel ʼn begroting vir elke persoon op sodat jy weet wat jy kan bekostig en hoeveel jy aan elke persoon kan bestee.”

Gebruik apps om jou in toom te hou

Deur middel van begrotings-apps en besparings-apps op jou slimfoon af te laai, soos Spending Tracker, 22Seven, MoneySmart en MyFinancialLife, kan jy jou begroting fyner dophou, al jou transaksies aanteken en presies weet waar en wanneer jy geld uitgegee het.

Moenie oorboord gaan met geskenke nie

Foto: sheknows.com

Probeer om jou inkopies rasioneel te benader. Praat met jou kinders oor hul verwagtings van Kersgeskenke en oor wat jy werklik kan bekostig. Stel ook vir jouself ʼn plan op oor watter geskenke jy gaan koop en koop met ʼn doel. “As jy net in die winkels gaan rondloop sonder ʼn plan gaan jy dalk jou begroting oorskry.”

Steward sê dat mense ook in gedagte moet hou dat Januarie weer baie ekstra uitgawes bring, veral vir ouers wat geld op skooluitgawes, uniforms en skryfbehoeftes gaan bestee.

“Onthou dat ʼn dag van toegee chaos in jou bankrekening kan saai en dat jy moontlik skuld gaan moet aangaan om te oorleef,” sê sy.