ʼn Ongeveer ʼn duisend leerders van 11 skole het in Julie die Voortrekkermonument in Pretoria besoek.
Van hierdie skole sluit in Oranje Meisies Primêre en Sekondêre Skool, Laerskool Willem Postma van Bloemfontein, Hoërskool Noordheuwel van Krugersdorp en Hoërskool Hugenote van Wellington in die Wes-Kaap. Oranje Meisies en Hoërskool Hugenote het tydens hul besoek ook in die Voortrekkermonument gesing.
“Dit is vir ons skool ’n jaarlike tradisie om in die Voortrekkermonument te sing. Baie van die kinders in ons koor het ook geskiedenis as ’n vak, daarom wil ons graag die Voortrekkermonument kom besoek,” het Wilhelm Broodryk van Hoërskool Hugenote gesê.
Werner Stander, koorleier van Oranje Meisies, vertel dat hulle skool ook hierdie tradisie volg. “Die akoestiek in die Voortrekkermonument is wonderlik. Ons bring altyd die toergroepe hierheen om die geskiedenis te leer, dan sing ons sommer ook,” vertel Stander.
Beide Hoërskool Hugenote en Oranje Meisies was in Pretoria vir die ATKV Applous, die organisasie se koorkompetisie.
Tydens ’n besoek aan die Voortrekkermonument kry skole ’n begeleide toer deur die monument en kan hulle ook die paadjies in die Trekroetetuin verken. Leerders kry ook die geleentheid om deur die museumwinkeltjies te stap en middagete word voorsien deur enigeen van die twee restaurante op die perseel.
Die afgelope skoolvakansie het die Pionierswerf ook gesorg vir hope pret met die vakansieprogramme. Daar was vele aktiwiteite waaraan kinders kon deelneem, onder andere stokbrood maak, boeresport, krygsgevangenekuns om maar net ʼn paar aktiwiteite te noem.
Miya van Deventer van Hoërskool Noordheuwel het gesê dit is vir haar lekker om meer oor die geskiedenis van die land te leer, terwyl die Groot Trek-leiers weer vir Sebastiaan van Rooyen, ook van Hoërskool Noordheuwel, die meeste uitstaan.
“Die Voortrekkermonument is ’n baken van hoop waar almal welkom is. Dat soveel kinders na die monument terugkeer, is net weer ’n bewys dat kinders meer oor hul geskiedenis en kultuur wíl leer,” het dr. Danie Langner, besturende direkteur van die Voortrekkermonument, gesê.
- Dié koorgroepe van Sekondêr en Primêr Oranje Meisieskool uit Bloemfontein het op 26 Julie ‘n besoek kom aflê aan die Voortrekkermonument. Besoekers van die monument was stomgeslaan toe dié meisies begin sing. En sing kan hulle sing!