Dié heerlike makietie, met meelbestrooide dansvloer en al, het hom daarop toegespits om die plaasatmosfeer na die stad te bring, en dít alles vir ʼn goeie doel.
Die Spit, Skud en Dans-fees, ʼn inisiatief van Solidariteit Helpende Hand en Maroela Media se Bemagtig ʼn Kind-projek, het Saterdag, 11 November, die gemeenskap byeengebring vir ʼn dag van lekker kuier en feesvier. Die groot skuur by die @75 Events Venue in Tierpoort het die toneel gebied vir ʼn onvergeetlike ervaring vir die hele gesin.
Die dag het afgeskop met die geur van heerlike skaap op die spit en ʼn uitgebreide verskeidenheid van bykosse wat die smake van Suid-Afrika gevier het. Die gemeenskap het die kans gekry om te dans op die plaaslike musiek van Vending Machine, terwyl die energieke Ricus Nel en sy Boerepompie die dansvloer laat skud het.
Vir die kleinspan was daar ʼn lammerkraal vol pret en vermaak, met plaasaktiwiteite soos skapies vashou, kettieskiet, skyfskiet, en selfs opwindende trekkerritte. Die kinders is besig gehou terwyl die volwassenes hul dansskoene aangetrek en die ritme van die musiek gevolg het.
Die fees het nie net ʼn dag van vermaak en geselligheid gebied nie, maar dit was ook ʼn geleentheid om ʼn goeie doel te ondersteun. Alle opbrengste van die dag is geskenk aan die Bemagtig ʼn Kind-projek, wat hom daarop toespits om die lewe van behoeftige kinders te verbeter. Die feesgangers het nie net hul eie harte gevul nie, maar ook ʼn hand gereik na diegene wat dit die nodigste het.
Chandré Oosthuizen, ʼn maatskaplike werker van Helpende Hand en projekorganiseerder van Bemagtig ʼn Kind, het dit beskryf as ʼn unieke ervaring waar die tradisionele plaasgevoel na die stad gebring is. Die hoogtepunt vir haar was die meel op die dansvloer en die gemeenskap wat saam gedans het.
“Die Spit, Skud en Dans-fees was nie net ʼn fees nie, maar ook ʼn geleentheid om saam te kom, te dans en hoop te bring vir die toekoms van kinders in nood. Die fees het ʼn suksesvolle veiling ingesluit, waar geld vir die projek ingesamel is,” sê Oosthuizen.
Die Bemagtig ʼn Kind-inisiatief voorsien in ʼn wye spektrum behoeftes van kleuterskool-, laerskool- en hoërskoolleerders, waaronder die volgende:
- Ekstra klasse
- Naskoolgelde
- Terapie (spel-, spraak- en arbeidsterapie)
- Vervoer na en vanaf die skool
- Koshuisgelde
Besoek Bemagtig ‘n Kind-webblad vir meer inligting en om die projek te ondersteun.
Oosthuizen het die volgende borge bedank wat die geleentheid moontlik gemaak het: SAAI, Maroela Media, Spektrum Gehoor, WildHorn-boerdery, Ons Winkels, @75 Events Venue, LekkerFM en On Nkwe.