‘n Keur van die vakansiefoto’s wat Maroela-lesers ingestuur het
Januarie voel soms soos die langste maand van die jaar – dit voel of die dag nooit weer gaan aanbreek wanneer jou salaris inbetaal word nie. Maroela Media wou graag ʼn leser bederf met ʼn bietjie ekstra kontant vir Januarie.
Ons het lesers genooi om hul vakansiefoto’s met ons te deel en boonop in aanmerking te kom vir ʼn kontantprys van R2 000.
Baie geluk aan Mia Burger wat met haar vakansiefoto as wenner aangewys is.
“Die dooie see in Swakopmund het ons hart vinnig gelukkig gemaak,” skryf Mia. “Dit was ʼn avontuur! Ons het mense van die grens ontmoet wat vir ons vertel het hulle hoor ons altyd eers voor hulle ons sien. Om sag te praat was nog nooit ʼn sterk punt in ons familie nie!”
Sy sê met dié foto het hulle darem probeer om saam te werk, maar hulle kan nie belowe dat jy nie ʼn gehoortoets sal nodig hê nie. “Die Burgers en Potties het Namibië die vakansie van bo tot onder uitgery. Dit was ʼn avontuur van ʼn leeftyd!”
Mia ontvang R2 000 kontant vir haar foto.
Mia Burger se wenfoto
Ons deel ook graag van die ander lesers se foto’s. Daar was pret op sandduine en in plaasdamme, rotspoele en watergate. Daar was waterballongevegte en kleilatgevegte. Sommige lesers het in die sneeu gaan speel of gaan roei. Daar is lesers wat uit vliegtuie of van kranse af gespring het. Daar is lesers wat met kamele gaan ry en ander wat met Jan Tuisbly se karretjie gery het. Daar was staptogte, familie-sametrekke en avonture met olifante, robbe en seekoeie. Daar was ook plaasvakansies en selfs ʼn verlowing of twee.
Ons wens ons kon al die foto’s met julle deel, maar uit die honderde foto’s wat ons ontvang het, kon ons uiteindelik net ʼn keur kies om te deel.
Geniet dit saam met ons en dankie vir elkeen wat hul foto’s ingestuur het!
-
- Elrine Smith: “Die oop ongerepte strand van Strandfontein aan die Weskus bied hope geleentheid vir informele strandaktiwiteite saam met jou hartsmense.”
-
- Corlia Laney: “My seun het op 28 Desember 2023 by Mosselbaai gaan vryval. Dit was die foto wat boekdele spreek. Ongelooflike belewenis en beste gevoel om te sien dat jou 17-jarige seun oomblikke soos dié geniet.”
-
- Yoweldi van der Mescht: “2023 se onvergeetlike vakansie by Hentiesbaai. Grys duintjie Chris-Dian (6) was baie pligsgetrou en het elke dag sy visstok self in gegooi en ‘n paar mooi vissies uit getrek. Hier oefen hy om so ver te kan gooi soos sy pappa. In sy element!”
-
- Chante Vos: “Ons in Mauritius. Ons het drie groot verjaarsdae gevier: My ma se 50ste, my 21ste en my suster se 18de. Ons het reg oor Mauritius gereis. Die hoogtepunt van die vakansie was die ‘Underwater Sea Walk’. My ma is doodbang vir die see en hou glad nie van seewater nie, maar hierdie avontuur het haar hele perspektief verander. Die visse swem reg om jou rond en dit is wanneer jy besef hoe geseënd ons is as mens om die natuur eerstehands te ervaar.”
-
- Edmare van Rensburg: “ʼn Kort wintervakansie met ʼn leeftyd se herinneringe in Tsaghkadzor, Armenië. Ons was geseënd met ʼn kluitklaplysie-wintervakansie met ʼn sneeubedekte Kersdag.”
-
- Natasha Nieuwoudt: “Met ons vakansie by Cayley Lodge het ons in die aande lekker kaart en Jenga gespeel. Hier speel my suster en seuntjie teen mekaar Jenga, en sy gesig sê als!”
-
- Terrie Liebenberg: “Ons het ou vriende by Oudekraal in Kaapstad ontmoet vir ‘n lekker middagbraai. My vriend (die braaimeester met die vinnige bril) was in beheer van die braai toe ek hierdie foto van hom gevang het. Ek dink dit vang die gees van Desember mooi vas, reg onder die Twaalf Apostels.”
-
- Diana Smit: “Ons twee vriende-families het weer gaan kamp by Sondela. Die kinders het soos die vorige keer gaan kleilat speel. Dit het begin as ‘n gewone kleilatgeveg, maar ná ʼn halfuur se oor-en-weer se mis gooiery, het hulle mekaar begin têkkel en met modder gegooi. Dit was soos altyd vet pret!”
-
- Wendy van Eyssen: “Ons kinders hou ʼn ballongeveg hou en giggel en baljaar, want die jaar was lank gewees. Nou geniet hulle die vakansie te lekker.”
-
- Ewoud Rykaart: “Hierdie foto is geneem op Oujaarsaand. My kinders het hul hond, Scooby, ‘n labrador, twee dae tevore verloor. Ons moes weens ernstige siekte hom laat uitsit. Met seer harte het my kinders diep gelag toe hulle met hierdie borrels gespeel het. Dit was vir ons so ‘n bittersoet oomblik. Ons het verskriklik na ons goeie vriend van agt jaar verlang, maar kon tog vreugde ervaar.”
-
- Janine de Swardt: “Die kinders kuier heerlik op die plaas; hulle help ouma en oupa boer. Die hanslam wou nie aangejaag word nie, so boeta het hom gedra.”
-
- Johanné Brand: “Ons kamp jaarliks in Dwarskersbos. Een van die kampeerders hou elke jaar vir ons straat ‘n Noot-vir-Noot-aand. Hierdie jaar was my man bang dat hulle nie sy span se liggie goed genoeg kon sien nie en die span het ‘n plan prakseer. Die enigste probleem was dat hulle liggie se bedrading aan die span langs hulle se bedrading gekoppel was, so toe die nood druk, moes hy albei liggies saamneem ablusie toe.”
-
- Etienne Vets: “Wel, dit is ek op my rug en my vrou Amanda moes op my maag val om ‘n ballon te bars tydens ‘n kompetisie op die NCL-bootvaart in die Karibiese eilande. Amanda het net ses maande gelede ʼn nekwerwel-operasie gehad en gelukkig was sy nie beseer tydens die ‘duik’ nie. Dit was een besondere vakansie. Hierdie foto is geneem op 07/01/2016 deur my dogter Anika.”
-
- Thali Hugo: “Ek en my vriendin het besluit om nie die gewone matriekvakansie-ding te doen nie. Ons het besluit om ʼn week in Muizenberg te gaan bly, branderplank te ry, te swem en net die natuur te geniet. Dit was fantasties! Ek wou nog altyd valskermsweef, en dit was ongelooflik om dit van my kluitklaplysie af te merk!”
-
- Elize Odendaal: “Ons kleindogter is verlief op Melbourne. Hulle bly op ʼn klein dorpie in East Gippsland, Victoria. Met ʼn onlangse wegbreek is hierdie foto geneem in een van Melbourne se bekende stegies. Pure pret en uitbundigheid om weer in haar geliefkooste plekke te wees.”
-
- Yolandie Otto: “Ek en my dogtertjie in die Kaap by Cool Runnings.”
-
- Esmeraldi Roos: “Ek (links) en my skoonma (regs) – heel voor in die koor – skree bietjie 2023 se frustrasies weg op die Anaconda by Gold Reef City. Het nou sommer ʼn nuwe tradisie begin.”
-
- Marthinette Vermaak: “Desember in Walvisbaai, Namibië. Eerste ervaring op kamele. Wat ʼn ondervinding! Beslis iets vir die kluitklaplysie.”
-
- Marthinette Vermaak: “As ons vakansie op die plaas is, dan is vroeg-opstaan en trekker-ry mos maar een van daai lekker dinge. Jessie, die skaaphond moet natuurlik saam. Plaaslewe is vakansie, al is dit ook werk.”
-
- Lizelle de Klerk: “Ons was vir ʼn familiefotosessie en het besluit om ʼn spring-foto te neem wat erg geflop het, daarom lag ons so lekker. Was ʼn baie nodige vakansie ná sewe jaar van geen vakansie nie!”
-
- Teresa Nel: “Hier is ons seuntjie (Rogan, 18 maande) wat in die Vaaldam speel. Hy is bitter lief vir water en het ʼn groot liefde vir visvang ontdek.”
-
- Lizelle de Klerk: “Skoonma is gereed vir die lang pad huis toe.”
-
- Thea Snyman: “Ons was in Thailand saam met die kleinkinders wat in Australië bly. En ons het ons kleindogter van ouma na oupa in die water gegooi. Dit was groot pret vir ons almal. ʼn Herinnering saam met ons kleindogter. Sy het so lekker uit haar maag uit gelag.”
-
- Anelda Oosthuizen: “Leeupoort-vakansiedorp is waar ons harte lê, daar is die diere familie, en word elkeen sommer gedoop met ‘n naam. Johny hier is een van ons gunstelinge en ons kan nie wag dat hy elke keer kom kuier sodat ons bietjie ‘mededeelsaam’ kan wees nie. Dit is voorwaar ‘n plek waar jy kan vergeet van al die gewoel en geraas van die stad. Johny is natuurlik ook mal daaroor om na al ons staaltjies en geselsies te luister; hy word met wortels beloon daarvoor.”
-
- Chantel Smit: “Niggies en nefie het vet pret op die mooie Melkbosstrand.”
-
- Wilmarie Grib: “Op ʼn koue, reënerige Desemberdag in die Drakensberge, het Jarrod op die ingewing van die oomblik besluit dat ʼn swem in die rotsagtige swembad met die berge in die agtergrond ʼn móét is vir sy vakansie. Hy’t nie twee keer gedink om sy warm klere uit te trek en te poseer vir ʼn foto nie!”
-
- Sannette Boltman: “As ons dink aan Desembervakansie, dan dink ons aan son, see en roomys. My dogtertjie geniet haar roomys!”
-
- Chané Marais: “Wanneer Oupa met baie min geduld besluit om sy kleinseun te leer visvang. Besonderse spesiale oomblik vir ʼn sesjarige seuntjie wat baie mooi moet luister na instruksies en geduldig moet wag vir ʼn vis om te byt.”
-
- (Foto: Louise Spijkerman)
-
- Jana van der Westhuizen: “Ons het as gesin gaan sandbord ry in Vleesbaai naby Mosselbaai. Dit was die eerste keer dat ons dit gedoen het, en die tieners kon self staan. Onvergeetlike herinneringe.”
-
- Leandri du Preez: “Ons was die vakansie vier gesinne wat saam Namibië aangedurf het. Dit was vet pret, tot die ver ry vanaf Pretoria tot in Langstrand. Hierdie foto is geneem op een van die duine met vyf van die agt kindertjies saam op vakansie.”
-
- Elsie Swanepoel: “My kleinseun Malan is mal oor sand en water, hier is hy in sy element in Melkbosstrand, Desember 2023.”
-
- Nathalie Magalie: “Ná my pa se afsterwe op 3 Desember 2022 het so baie dinge in ‘n oogwink verander. Vir iemand wat ‘n ekstrovert is; wou ek glad nie meer die lewe ten volle geniet nie. Stelselmatig het my gesondheid daaronder gely. Deel van ons vakansielys was ‘n uitstappie na Franschhoek op die wyntrêm. Hier kon ek my eie ek weer ontdek. Kuiertjies saam met die gesin, vriende en ná soveel maande kon ek weer uit my maag lag, die lewe vierkantig in die oë staar en weereens besef hoe dankbaar ek vir die Here is. Hy het my weer ‘n geleentheid gegee om die mooi van die lewe te geniet en elke oomblik te koester.”
-
- Chané Marais: “Wanneer jy nie ʼn swembad nodig het nie, maar ʼn hele see en poeletjies het, dan baljaar jy in vreugde en arme ousus moet net help. Liefde onbeskryflik.”
-
- Alizia Keet: “Ons was in Mosambiek vir die Desembervakansie en het een dag besluit dat ons so bietjie met die boot gaan uitgaan. Ons het gaan snorkel, maar die stroom was vreeslik sterk, so ons moes aan die tou vashou anders moes ons lekker swem om weer by die boot uit te kom. Was groot pret saam met die familie gewees.”
-
- Talitha Hellerle: “Ons was die vakansie in Jeffreys en het vir die dag die Tsitsikamma-natuurreservaat besoek. Een van die mooiste plekke in Suid Afrika. Ons wou dié vakansie een ding op elke persoon se kluitklaplysie doen en myne was om by die rivier af te gaan met binnebande en skepbord te ry. Uiteindelik was dit vir almal die lekkerste tyd van die vakansie.”
-
- Carien Wessels: “Lekker visgevang by ons huis op Vygeboomdam in Mpumalanga! My man Henru en seuntjie Mynhardt leef vir visvangtyd.”
-
- Driekie Vorster: “Ons was met vakansie in die Kalahari. Dis my man se oom se plaas. Daar is geen winkels naby nie, so as jy dors is, hoop jy om ʼn koei naby te kry.”
-
- Joey Hattingh: “Kinders van die Kaap kom kuier bietjie by oupa en ouma op die plaas.”
-
- Michelle Nolte: “Jeffreysbaai se golwe is groot en sterk. Om hier te roei, is harde werk! As jy omkyk en skielik besef dis dalk jou laaste dag, is al wat jy kan doen om voort te roei en te lag!”
Luzanne Visser skryf: “Ons het die vakansie by Algeria in die Cederberge gekamp. Ons het dié foto by Welbedachtgrot geneem.”
