Jy is nie alleen nie, emigrant

Foto: deur Tim Gouw van Unsplash

Ek praat met jou, die emigrant. Jy, wat jou wortels uitgetrek het om dit weer te probeer vestig in vreemde grond. Jy, wat met jou hart in twee geskeur rondloop – ʼn stuk van jou in ʼn ander land as jou lyf. Jy, wat moes kies tussen jou geskiedenis en jou toekoms. Jy, wat nie meer pas in die plek waar jy vandaan kom nie, maar ook nie heeltemal pas in die plek waar jy jou bevind nie.

Ek praat met jou, wat nou ʼn tyd beleef soos nog nooit gesien in ons leeftyd nie, en dit boonop in ʼn vreemde land. Jy is ver van jou vriende en familie. Ja, dit was jou keuse. Maar toe jy daardie keuse gemaak het, het jy nie geweet wat voor jou lê nie. Jy het nie geweet dat jy baie van die mense wat jy groet, nooit weer sal sien nie. Jy het nie geweet dat die aarde se gemeenskaplike moeilikste tyd voor jou was nie.

Jy het nie geweet dat jou ouma deur hierdie pandemie weggeruk gaan word nie. Jy het nie geweet dat jou broer se gesin en sy eenjarige seuntjie positief sal toets vir hierdie verskrikking van ʼn virus nie. Jy het nie geweet dat jou sussie se droomtroue afgestel sou word nie. Jy het nie geweet dat jou neef sy werk sou verloor en sy gesin van aalmoese afhanklik sou wees nie. Jy het nie geweet dat jou kuier by die “huis” sou verhoed dat jy teruggaan na jou aangenome land nie. Dat jou gesin dan vir maande in ʼn houthuis sou moes bly terwyl al jou spaargeld verdwyn, jy jou werk en jou huurhuis sou verloor nie. Dat jy nie sou weet wanneer daar weer eendag internasionale vlugte sou wees om by die huis te kom nie. Jy het nie geweet jy sou nie kan teruggaan na die lewe wat jy vir jou gesin gebou het nie, en dat jy op die punt sou staan om alles te verloor nie.

Ek praat met jou wat met ʼn tydelike visum in ʼn vreemde land sit. Dit het alles gekos om daar te kom, en nou weet jy nie of jy alles gaan verloor nie. Jy, wat weet jou toekoms is uit jou hande en jy weet die politici gaan gewetenlose besluite neem wat bepaal wat met jou gesin se toekoms gebeur. Jy, wat nie weet waar jy oor ses maande of ʼn jaar sal wees nie en die moontlikheid van platsak teruggaan Suid-Afrika moet bedink. Jy, wat nou moet hoor “Gaan huis toe!” en jy weet daar is niks vir jou daar nie. Jy, wat nou ʼn ongenooide, onwelkome bywoner in ʼn vreemde land is.

Vir ons is die vrese en angs van hierdie tyd uniek, en ons kan nou kies hoe ons gaan reageer. Soos die Israeliete wat uit Egipte gevlug het na ʼn vreemde land, is daar reuse voor ons. Hierdie reuse kan ons toekoms vermorsel, of bitter moeilik maak. Ons kan nou kies om te kyk na die reuse, of ons kan klippies optel en kyk na ons God. Hy het tog immers geweet wat kom lank voor ons. Hy het ons paadjies in Sy hand. Jy is Sy kind en Hy hou jou in die holte van Sy hand waar jou naam gegraveer staan saam met dié van jou ouers, jou susters en broers, jou kinders en jou vriende. Net soos vir jou, wil Hy ook vir hulle die beste hê.

Jy, emigrant, is gestuur na die plek waar jy nou is. Jy kom van ʼn plek waar die Here vir ons ʼn geleentheid gegee het om Hom te leer ken en te dien. In ander lande is dit nie so maklik nie, selfs baie van die lande waar ons emigrante nou woon, is dit nie maklik nie. Die pad wat voorlê is donker, en ons weet nie wat hy inhou nie. Maar in hierdie tyd van onsekerheid, onmin en hartseer, dra jy die Lig. Onthou dat jy nie alleen is nie. Jy is een van miljoene emigrante, elkeen met ʼn unieke storie en uitdagings.

Jy is nie alleen nie. Ek is saam met jou in hierdie ding. En God ook.