“Waarom noem julle My “Here” as julle My nie gehoorsaam nie?” (Lukas 6:46)
Die term “Here” was in Jesus se tyd bekend aan die meeste mense. Dit is die Griekse woord kurios wat beteken “om mag te hê, om met outoriteit beklee te wees”. Dit dui op ’n heer of meester of koninklike heerser. Dit is ook die Naam wat vir die Here Jesus gebruik word.
Dit is interessant dat Jesus alreeds op aarde Here genoem is nog voordat Hy as Here bo almal gekroon is (Fil. 2:9-11). Die outoriteit en krag waarmee Hy opgetree het, het mense instinktief in hulle gees voor Hom laat buig.
Jesus het egter geen behoefte aan titels of rangtekens nie. Hy wil net ’n dienskneg wees. Vir Hom gaan dit nie oor sy posisie nie, maar oor die werk wat Hy kom doen het. Daarom vra Hy die vraag: “Waarom noem julle My ‘Here’ as julle My nie gehoorsaam nie?” Dit dui tog op ’n teenstrydigheid. As jy here, koning, heerser sê, beteken dit mos dat jy onder daardie persoon se gesag staan. Dan is jy mos onder die verpligting om sy bevele uit te voer. Dan moet jy doen wat hy sê.
Kom ons sê opnuut vir Jesus dat Hy ons Here is, maar kom ons wys dit ook deur ons gehoorsaamheid aan sy opdragte.
Baie dankie Maroela dat daar tussen slegte nuus nog goeienuus gereeld deur kom
Amen
Dankie vir die Gedagte vir die Dag!