Maar ék sal sing van u mag, elke môre sal ek jubel oor u trou, want U is vir my ’n veilige vesting, ’n skuilplek in tyd van nood. (Psalm 59:17)
In die nag is daar mense om Dawid se huis. Hulle is deur Saul gestuur, waarskynlik om te verhoed dat Dawid ontvlug, want Saul het Dawid gewantrou en gehaat. Dawid beskryf die figure daarbuite in die donker as “honde” wat om sy huis sluip en grom. Hy vra die Here om hom tog van sy vyande te red. Soos so dikwels eindig sy psalm, wat vol onheil en klagte was, dan op ’n jubelende noot. Sal ons ook leer om, as ons klaar gekla en gevra het, ons vaste vertroue in God te bely? In elk geval, nou is dit weer oggend en Dawid prys die Here, want in die daglig het die nag se bedreigings verdwyn.
Dis so tipies dat ons in die nag die donkerste gedagtes kan uitdink, maar in die dag lyk alles sommer beter. Ons moet tog nooit gevolgtrekkings in die (letterlike en figuurlike) nag maak nie – laat God se son eers daaroor opkom. Sien eers dinge in sý lig!
Here, as dit donker is in my lewe: Gee my geloof en gee my geduld tot die son weer opkom. Amen.
Genade en Hoop as al waaraan ons moet vashou, dank aan ons Almagtige God vir dit wat vir ons nog daar is.
Amen !