Foto: Nedine Blom
As iemand gewillig is om God se wil te doen, sal hy weet of dié onderrig van God afkomstig is en of Ek uit my eie praat (Johannes 7:17)
Ons jongste seun het ’n paar jaar gelede sy sakgeld in ’n toeritsplastieksakkie gebêre en aanhou sê dat hy dit vir ’n groep hawelose, werklose mans gaan gee wat elke dag naby ons huis rondgestaan het. Uiteindelik het ek ingegee en gesê: “Goed, vandag is die dag.” Ek het na die groep mans toe gery en die motor in die stof tot stilstand gebring. My seun het uitgeklim en na ’n man toe gedrafstap.
Dié man het met ’n breë glimlag regop gespring. Dit was asof hy die blonde kind op daardie warm Dinsdag verwag het. Daar was geen ongemak nie. Geen verduidelikings was nodig nie. Dit was ’n God-oomblik. Die geheimenis van eenvoudige geloof en eenvoudige getrouheid.
Ek onderskat die Heilige Gees se krag in my kinders se lewens. Hoe onvolwasse hulle begrip van geloof ook al is, as hulle Jesus aanvaar het, het hulle sy Gees ontvang (Rom. 8:9). En die Gees sal hulle in die volle waarheid lei (Joh. 16:13), sy begeertes in hulle harte openbaar (Ps. 37:4) en hulle aanspoor om sy wil te doen (2 Tess. 1:11). Ek en jy kan ook hierop staatmaak.
Ons sê so dikwels ons sóék God se wil, asof dit weggeraak het. Maar eintlik is dit nie so moeilik om raak te sien wat volgende op sy agenda vir jou is nie. Dit is nie so diep verborge nie.
Here, help my om te ontspan en te doen wat U vra. Amen.
Dankie Here dat U in ons lewens is. Dankie vir al U genade en seëninge Here. Amen!
Dankie vir die mooi boodskap Sy woord daar in was regtig vir my bedoel. “God is not dead”
Ek waardeer al die boodskappe. Mag die senders God se seen ervaar.