Resep: Vars kruie-, roket- en sampioenslaai

Vars kruie-, roket- en sampioenslaai. (Foto: Lapa Uitgewers)

Kry daardie somerlyf reg met hierdie lekker slaai.

Lewer 4 porsies.

Bestanddele

• 5 ml druiwepitolie
• 250 g (1 pakkie) sampioene, in skywe gesny
• 60 ml rooiwyn
• 2,5 ml sout
• 2,5 ml varsgemaalde swartpeper
• 2,5 ml fyn gemengde kruie
• 80 g roketblare
• 125 ml vars basilieblare, geskeur
• 125 ml vars vinkel
• 60 ml gesnyde pikante rissies
• 125 ml geroosterde amandelvlokkies

Slaaisous

• 30 ml olyfolie
• 15 ml balsamiese asyn
• 2,5 ml sout
• 2,5 ml varsgemaalde swartpeper

Metode

1. Verhit die druiwepitolie in ʼn braaipan oor matige hitte. Braai die sampioene ʼn paar minute tot bruin en roer gereeld. Voeg die rooiwyn daarby en laat verdamp. Strooi die sout, swartpeper en kruie daaroor, meng en laat afkoel.
2. Meng die roketblare, basilie en vinkel in ʼn slaaibak en strooi die sampioene en pikante rissies daaroor.
3. Slaaisous: Meng die olyfolie, asyn, sout en swartpeper.
4. Strooi die geroosterde amandels oor die slaai en sit voor saam met die slaaisous.

Bron: Slim laekoolhidraat-geregte
Uitgewer: Lapa