Resep: Hoenderbobotie

Hoenderbobotie. (Foto: Lapa Uitgewers)

ʼn Smaaklike gereg om die hele gesin gelukkig te hou.

Lewer 4-6 porsies.

Bestanddele

• 15 ml kanola-olie
• 2 uie, fyngekap
• 15-20 ml masala
• 5-10 ml borrie
• 5 ml fyn komyn
• 5 ml fyn gemmer
• 1 hoender, gekook en ontbeen
• 50 ml sultanas
• sout en varsgemaalde swartpeper (na smaak)
• 80 ml mayonnaise
• 20 ml appelkooskonfyt
• 10 ml suurlemoensap
• 1 pakkie hoenderroomsoppoeier
• 3 ml gemengde kruie
• 330 ml melk
• 2 eiers

Metode

1. Voorverhit die oond tot 180 °C en smeer ʼn oondvaste bak.
2. Verhit die olie in ʼn swaarboomkastrol en braai die uie tot sag.
3. Voeg die masala, borrie, komyn en gemmer by die uie en braai liggies vir 1-2 minute.
4. Voeg die hoender en sultanas by die uie en roer deur. Skep die hoendermengsel in die voorbereide oondbak. Geur dit met sout en peper.
5. Meng die mayonnaise, konfyt, suurlemoensap, soppoeier, gemengde kruie en 250 ml van die melk saam en giet dit oor die hoendermengsel. Meng dit deur met ʼn vurk.
6. Klits die eiers en oorblywende melk saam en giet dit oor die hoendermengsel.
7. Bak vir 40-45 minute en bedien saam met geelrys.

Bron: 50 Hoendergeregte
Uitgewer: Lapa