Wonder jy nog wat jy dié naweek aanmekaar gaan slaan? Gebruik hierdie unieke resep vir ʼn smullekker ete.
Lewer 6 porsies.
Bestanddele
- 500 g skelvismootjies of -filette
- 3 groot eiers, hardgekook, afgedop en in skyfies gesny
- 125 g ontpitte pruimedante, ʼn uur in water geweek, gedreineer en gehalveer
- 25 ml soja- of kekerertjiemeel
- 25 ml mielieblom, of aartappel- of tapiokameel
- 400 ml laevetmelk (of laevetsojamelk indien laktose-onverdraagsaam)
- 10 ml sagte margarien
- 1,25 ml sout
- knippie rooipeper of paprika
- 125 ml gerasperde cheddarkaas (50 g) – hou ʼn bietjie vir bo-oor strooi
- paprika
- vars vinkelblare of gekapte vars pietersielie vir garnering
Metode
- Voorverhit die oond tot 180 °C. Posjeer die skelvis in ʼn bietjie water vir 6 tot 9 minute, of totdat dit maklik vlok. Dreineer en vlok die vis en verwyder enige grate. Skep die vis in ʼn oondbak. Rangskik die eierskyfies op die vis en versprei die pruimedanthelftes bo-op.
Kaassous
- Meng die soja- of kekerertjiemeel en mielieblom met ʼn bietjie van die melk tot ʼn gladde pasta. Verhit die res van die melk en margarien tot kookpunt. Roer die mielieblompasta in ʼn dun straaltjie by. Roer en kook vir 2 tot 3 minute totdat die sous dik en gaar is. Geur dit met sout en rooipeper of paprika en roer van die kaas by. Skep die sous oor die gereg en strooi die oorblywende kaas en paprika oor.
- Bak dit vir 20 tot 25 minute tot borrelend. Garneer met vinkel of pietersielie en bedien dit met ʼn groenslaai en jongaartappels in die skil gekook.
Bron: Skelvis met pruimedante en kaassous
Uitgewer: Lapa
Met skelvis wat meer as R200.00 per kg kos, eet ek eerder skaapvleis @ R105.00 per kg dankie. Selfs eenvoudige stokvis kos al R140.00 per kg.