Maak ‘n plan om genoeg te slaap. (Foto: iStock)
Een ding wat op elkeen se Nuwejaarsvoornemelysie behoort te wees, is ʼn goeie nag se rus.
Of jy nou hoop om jou gesondheid te verbeter, gewig te verloor, jou leefstyl en huis op te knap, of net wil leer om te ontspan, kenners meen dít alles begin by die gehalte van jou slaap.
“Ons moedig mense aan om die krag van slaap in hul lewens in 2024 aan te gryp om al die voordele te geniet wat ʼn goeie nagrus bied,” sê Dale Harley, verkoops- en bemarkingsbestuurder by Restonic, wat die hulp van slaapkenner, dr. Alison Bentley, ingeroep het om wenke vir beter slaapgewoontes te deel.
Slaap gaan oor veel meer as rus
Volgens Bentley dui navorsing daarop dat slaap ons immuniteit teen infeksie verhoog en die waarskynlikheid van toestande soos hartsiektes, diabetes, depressie en demensie verminder.
Verder is voldoende slaap volgens haar ook noodsaaklik vir optimale kognitiewe funksie, insluitend geheue, konsentrasie en probleemoplossingsvaardighede.
“Dit het ʼn diepgaande uitwerking op emosionele regulering en veerkragtigheid. Soos die meeste mense uit persoonlike ervaring sal weet, kan ʼn gebrek aan slaap bydra tot verhoogde stres, prikkelbaarheid en ʼn verminderde vermoë om uitdagings die hoof te bied.”
Sy benadruk ook die rol wat slaap speel om ons te help om nuwe vaardighede aan te leer.
“Dit is omdat die brein herinneringe konsolideer en inligting wat deur die dag verkry word, verwerk terwyl jy slaap. Slaap is ook gekoppel aan verbeterde kreatiwiteit en probleemoplossingsvermoëns, asook aan streshantering. Chroniese slaaptekort kan streshormone verhoog, wat dit moeiliker maak om die druk wat verband hou met persoonlike en professionele verantwoordelikhede te hanteer.”
Kry genoeg slaap. (Foto: iStock)
Bentley sê daar is konkrete stappe wat enigiemand kan neem om beter te slaap. Dit staan bekend as “slaaphigiëne”.
“Net soos jy tandeborsel deel van jou daaglikse higiëne-roetine maak, moet die beoefening van goeie slaapgewoontes ook deel van jou daaglikse roetine wees.”
Hier is dr. Bentley se top-slaapwenke:
- Gebruik natuurlike lig as beginpunt
Sy beveel die gebruik van en blootstelling aan natuurlike lig ten sterkste aan. “Navorsing toon dat vroeë blootstelling aan helder sonlig die slaapprosesse stop wat ʼn lang dag skep sodat jy snags op die regte tyd slaperig voel. Daarbenewens help blootstelling aan natuurlike sonlig gedurende die dag om jou liggaam se interne horlosie te reguleer, wat beter rus bevorder.”
- Maak seker jy gaan slaap wanneer jy moeg is
“Indien jy nie altyd snags moeg voel teen ʼn sekere tyd nie, maak seker dat jy ʼn goeie roetine voor slaaptyd het en moenie die lig afskakel voordat jy slaperig is nie. Om te vroeg te gaan slaap verbeter nie slaappatrone nie, en nie almal gaan slaap op dieselfde tyd nie.”
- Omarm ʼn kort middagslapie, oftewel power nap
ʼn Middagslapie van 20-30 minute kan volgens Bentley help om oormoedigheid te oorkom, maar nie almal het die vermoë of voorreg om deur die dag ʼn middagslapie te neem nie.
“Langer slapies kan egter jou slaap in die nag belemmer, so leer jou liggaam ken om te weet hoeveel slaap jy deur die dag kan neem, sonder om jou slaap saans te belemmer.”
- Maak jou slaapkamer slaapgereed
ʼn Koel, donker en stil omgewing bevorder beter slaap. Volgens Bentley is dit belangrik om in goeie matrasse en kussings te belê wat jou liggaam ondersteun.
“Goeie slaaptoerusting help jou nie net om beter te slaap nie, maar ook om beter uitgerus te voel.”
- Verminder blou lig van skerms voor slaaptyd
Probeer skermtyd vermy of verminder minstens ʼn uur voordat jy gaan slaap, en maak gebruik van die bloulig-filterfunksies wat baie toestelle nou bied. Volgens Bentley kan blou lig jou sirkadiese ritmes beïnvloed, wat jou slaap- en wakkerwordsiklusse beheer.
- Ontwikkel ʼn kalmerende roetine voor slaaptyd
Of dit nou is om ʼn boek te lees, te bad, tee te drink, stilte tyd te hou of net ʼn paar keer diep asem te haal. ʼn Kalmerende roetine voor bedtyd, help volgens Bentley die liggaam en brein om stelselmatig af te skakel en makliker aan die slaap te raak.
