Ford se splinternuwe Ranger word hier op eie bodem vervaardig in sy spoggerige nuwe aanleg in Silverton. Ons het reeds die 2.0 BiTurbo- en V6-modelle onder hande gehad, maar wat van die enkel- en superkajuit?
Ford se Ranger-reeks sal vanaf Maart in enkelkajuit- en superkajuitmodelle by handelaars beskikbaar wees. Die dubbelkajuit is reeds beskikbaar. Daar is vier enkelkajuitmodelle beskikbaar. Almal loop met Ford se 2.0‑viersilinder‑enkelturbodieselenjin. Dié enjin bied 125 kW en 405 Nm. Daar is twee ratkaste beskikbaar, 6-spoed‑handrat en 6-spoed‑outo. Daar is ʼn 4×2- en 4×4-dryfstelsel beskikbaar – en alle enkelkajuitmodelle is met XL-spesifikasie toegerus.
Die Ranger se superkajuitreeks bestaan uit ses modelle. Vier maak van die enkelturbo-enjin gebruik wat 125 kW en 405 Nm bied, en twee van die 2.0‑dubbelturbodieselenjin wat 154 kW en 500 Nm bied. Weereens gaan die enkelturbo met ʼn 6-spoed‑handrat of outo gepaard, in 4×2- of 4×4-dryfstelsel. Die twee reeksleiers, XLT en Wildtrak, gebruik 2.0‑dubbelturbo, albei gepaard met 10-spoed‑outo en slegs met ʼn 4×4-dryfstelsel beskikbaar.
Die jongste Ford Ranger-onderstel is ongelooflik verfynd. Die enjin-ratkas‑kombinasies is perfek gepas en die kalibrasie daarvan is ook uit die boonste rakke. Om jou eie Ranger pas te maak, presies soos jy hom wil hê, sal Ford steeds op die enkelkajuit- en superkajuitmodelle die sewe bykomende pakkette beskikbaar stel.
Die tweede groot mylpaal wat Ford onlangs bereik het, is die begin van uitvoere vanuit Suid-Afrika na meer as 100 markte wêreldwyd. Suid-Afrikaanse Rangers word ook na Europa uitgevoer waar Ranger die leier in die bakkiesegment is.
Ná die R15,8 miljard-belegging in die Silverton-aanleg het Ford nou aptyt vir groot uitvoerkapasiteit, maar hy sal met die nodige owerhede moet saamwerk om vertragings in die hawens en by die spoorweë uit die weg te ruim.
Die enkelkajuitreeks lyk só:
Ford Ranger 2.0 SiT XL 4×2 handrat | R464 200 |
Ford Ranger 2.0 SiT XL 4×2 outo | R477 800 |
Ford Ranger 2.0 SiT XL 4×4 handrat | R531 300 |
Ford Ranger 2.0 SiT XL 4×4 outo | R545 000 |
Die superkajuitreeks lyk só:
Ford Ranger 2.0 SiT XL 4×2 handrat | R485 400 |
Ford Ranger 2.0 SiT XL 4×2 outo | R499 900 |
Ford Ranger 2.0 SiT XL 4×4 outo | R542 900 |
Ford Ranger 2.0 SiT XLT 4×2 outo | R547 100 |
Ford Ranger 2.0 BiT XLT 4×4 outo | R688 900 |
Ford Ranger 2.0 BiT Wildtrak 4×4 outo | R772 800 |
Die reekse word gedek deur ʼn vier jaar/120 000 km-waarborg. Diensplanne is bykomend beskikbaar.
Geen betrokkenheid van die ANC nie, geen korrupte kaders wat uit die trog vreet nie, daarom: Sukses. O ja, van die mees gevorderde robotika help ook seker.
Baie mooi en goed toegerus maar dit bly ‘n Ford.
Ek is bly sekere fabrikate erken hulle foute en verbeter op dit. Ford is ‘n goeie voorbeeld wat goeie voertuie produseer maar partykeer gesukkel het met kwaliteit. Tussen die nuwe Ranger en Amarok sal ek beslis die Ranger vat. Toyota het baie huiswerk om te doen om die Hilux op gelyke speelvlak te bring.
Die Amarok is net so treurig