Dekades lank, veral toe ek grootgeword het, was Duitse handelsmerke soos BMW en Mercedes-Benz bekend vir hul luuksheid. Audi het ook later bygekom en Peugeot het onlangs ʼn paar sesse geslaan.
Die nuwe 3008 is ʼn pragvoertuig. Die ontwerp is kraakvars en bitter mooi nes sy 2008-kleinboet. Die luuksheid van die binneruim is egter dít wat die 3008 van die 2008 onderskei en sy meerderwaardigheid beaam. Ons het onlangs die topmodel, die GT, onder hande gehad.
ʼn Reusesondak, pragtige Nappa-leer-sitplekke wat elektries verstelbaar en verhit is, hoëdefinisie- digitale instrumente, houtinsetsels en bougehalte wat tot die Duitsers sal laat bloos van trots is ʼn fantastiese verrassing in dié Peugeot.
Kyk, ek gaan nie skroom om te sê dat Peugeot ʼn moeilike geskiedenis in Suid-Afrika agter die rug het nie. Wat my wel opgewonde maak, is dat hy nou deel is van Stellantis wat ook Citroën, Opel, Alfa Romeo, Fiat en Jeep in Suid-Afrika besit.
Die 3008 word deur ʼn turboaangejaagde 1.6-viersilinderpetrolenjin aangedryf wat 121 kW en 240 Nm bied. Die enjin gaan gepaard met ʼn 6-spoed- outomatiese ratkas; 0–100 km/h neem 8,9 sekondes en hy sal 201 km/h voluit haal. Nie sleg nie. Dít terwyl hy 7 l/100 km kan handhaaf met die gekombineerde siklus.
Op die pad blink die 3008 verder uit. Die lieflike sitplekke en soepel rit laat dit voel of ʼn mens in ʼn heerlike kokonnetjie toegevou word. Om ʼn mens veilig te hou is daar ses lugsakke, sluitweerremme met remkragverspreiding, vastrap en stabiliteitsbeheer, asook noodremhulp.
Is die 3008 dan perfek? Amper. Ek het twee goggatjies wat pla. Ek kan net nie aan die klein stuurwieletjie gewoond raak nie, en die skakelaars op die paneelbord wat baie funksies beheer, is vir my nie vreeslik gebruikersvriendelik nie, maar verder is die 3008 ʼn lieflike voertuig.
Indien jy in die mark is vir ʼn luukse C-segment-sportnuts, moet jy asseblief beslis die 3008 toetsbestuur.
Die reeks lyk só:
Peugeot 3008 1.6T Active | 121 kW/240 Nm | 7 l/100 km | R514 900 |
Peugeot 3008 1.6T Allure | 121 kW/240 Nm | 7 l/100 km | R574 900 |
Peugeot 3008 1.6T GT | 121 kW/240 Nm | 7 l/100 km | R644 900 |
Die reeks word gedek deur ʼn 5 jaar/100 000 km-waarborg en diensplan.
Die kompetisie lyk só:
Haval H6 2.0T 4WD Super Luxury | 150 kW/320 Nm | n/b | 5 jaar/100 000 km- waarborg 5 jaar/60 000 km- diensplan | R514 900 |
Subaru Forester 2.5i-S ES | 136 kW/239 Nm | 8.3 l/100 km | 5 jaar/150 000 km- waarborg 3 jaar/75 000 km-omvattende instandhoudingsplan | R629 000 |
Toyota Rav4 2.5 AWD VX | 152 kW/243 Nm | 7.3 l/100 km | 3 jaar/100 000 km- waarborg 6-dienste-diensplan | R634 700 |
Volkswagen Tiguan 1.4TSI 110kW R-Line | 110 kW/250 Nm | 7.7 l/100 km | 3 jaar/120 000 km- waarborg 5 jaar/90 000 km- diensplan | R644 500 |
Kia Sportage 2.0 CRDi EX Plus | 131 kW/400 Nm | 6.3 l/100 km | 5 jaar/onbeperkte km-waarborg 5 jaar/90 000 km- diensplan | R644 995 |
BMW X1 sDrive18i | 103 kW/220 Nm | 6.3 l/100 km | 2 jaar/onbeperkte km-waarborg 5 jaar/100 000 km- omvattende instandhoudingsplan | R645 934 |
Mazda CX-5 2.2DE AWD Akera | 140 kW/450 Nm | 5.7 l/100 km | 3 jaar/onbeperkte km-waarborg 3 jaar/onbeperkte km-diensplan | R686 200 |
Hyundai Tucson 2.0D Elite Sport | 150 kW/460 Nm | 7.9 l/100 km | 5 jaar/150 000 km- voertuigwaarborg 7 jaar/200 000 km- dryfstelselwaarborg 5 jaar/90 000 km- diensplan | R751 500 |
Honda CR-V 1.5T Exclusive AWD | 140 kW/240 Nm | 7 l/100 km | 5 jaar/200 000 km- waarborg 5 jaar/90 000 km- diensplan | R773 100 |
Die segment bars uit sy nate met opsies. Ek’t nog nie Haval se nuwe H6 gery nie, maar hoor dit is ʼn fantastiese verbetering op die ou model. Die Subaru en Toyota bied vierwielaandrywing teen ʼn goeie prys. Die Mazda is effens duur, maar die Hyundai en Honda is buitensporig. Maak vir jou ʼn kortlys en toetsbestuur almal, een gaan met jou hart praat.
Die prys is hoog, veral vir ‘n maak wat nog nooit, behalwe in die 80’s met die 405, goed in SA gevaar het nie. Jy bring so ‘n kar sowat 10 tot 15% goedkoper in. Verloor ‘n bietjie geld, maar bou jou handelsmerk op. Dis waar die Chinese sin maak, en die Koreaane het dit ook gedoen.