Die Toyota Corolla Cross
Ten spyte van stygende rentekoerse en die astronomiese pryse van nuwe voertuie, het motorverkope vir 2023 goed afgeskop.
Daar is verlede maand 2 127 (5,1%) meer voertuie verkoop as in Januarie 2022, ook 1 726 (4,1%) meer voertuie as in Desember. Selfs uitvoere het met 7,5% jaar op jaar gestyg en daar is 20 536 motors in Januarie uitgevoer.
Die topvyf-handelsmerke wat plaaslike verkope betref, is Toyota (12 532), Volkswagen (5 081), Suzuki (4 357), Nissan (2 927) en Hyundai (2 525). Die toptien word afgerond deur Renault (2 051), Kia (1 686), Ford (1 661), Haval (1 565) en Isuzu (1 527).
Die topvyf-passasiersvoertuie, toevallig ook die enigste modelle waarvan daar meer as eenduisend eenhede verkoop is, én slegs aan die topdrie-handelsmerke behoort, lyk só:
| Toyota Corolla Cross | 2 042 |
| Toyota Starlet | 2 037 |
| Suzuki Swift | 1 499 |
| Volkswagen Polo | 1 144 |
| Volkswagen Polo Vivo | 1 054 |
Die topses-ligtehandelsvoertuie lyk só:
| Toyota Hilux | 2 769 |
| Isuzu D-Max | 1 273 |
| Ford Ranger | 1 269 |
| Toyota HiAce | 1 257 |
| Nissan NP 200 | 886 |
| Mahindra Pik-Up | 819 |
Nissan se Navara, wat ook in enkelkajuit beskikbaar is, het in Januarie net 351 eenhede verkoop. Ford se enkelkajuit- en superkajuitweergawes is nou beskikbaar; ek is dus oortuig daarvan dat ons volgende maand ʼn beter prentjie uit Ford se stal sal sien.
Suid-Afrika het vyf groot uitvoerders en die meeste van hulle spesialiseer in een produk, byvoorbeeld BMW doen slegs die X3, Mercedes-Benz slegs die C-klas en Volkswagen slegs die Polo. Toyota is ietwat anders en vervaardig verskeie motors in hul aanleg, maar voer meestal net die Hilux uit en ʼn paar Corolla Cross- en Fortuner-modelle.
Die topvyf lyk só:
| Toyota | 7 352 |
| Volkswagen | 5 315 |
| BMW | 4 700 |
| Ford | 1 682 |
| Mercedes-Benz | 773 |
Terwyl ons verskeie uitdagings in Suid-Afrika het, onder meer die talle rentekoersverhogings en logistieke uitdagings, wil dit lyk of die meeste vervaardigers positief is dat die halfgeleiermikroskyfiekrisis iets van die verlede is en hulle weer goeie toevoer van onderdele kan geniet. Indien dit kan gebeur, is die volgende uitdaging verskeping, maar verskeie vervaardigers voer allerhande planne in die mou om dié uitdaging die hoof te bied.
Ek het onlangs die nuwe Ranger 2l diesel twin turbo toetsbestuur. Indrukwekkende voertuig met sy ontwerp, kwaliteit en verrigtinge. Hierdie voertuig voel ewe tuis op die teerpad en grondpad, self die rygerief en gemak is puik op grondpaaie. Dit is opmerklik dat VW besig is om sy markaandeel in SA te verloor, wat die rede daarvoor is kan by die VW handelaars uitgevind word. Na my mening is dit die gevolg van vergrype na geld. Suid Afrikaners kry meer vertroue in ingevoerde modelle en raak minder tradisioneel as dit by vervaardigers se name kom. Ek self besit al sederd 1983 net VW voertuie en hierdie huwelik staan nou einde se kant toe. Die groot rede is pryse van nuwe VW’s, instandhouding wat die hoogte inskiet, onderdele se pryse bly styg. Nee wat, hierdie vrou moet terug gaan na haar ouers toe, sy het te duur geword.
Stem saam met jou, VW se parte raak onbekosigbaar. Lys van parte vir ‘n polo onlangs was R10500 by VW . By Golfwagen R2000. Hulle gaan veseker pak slae kry hieroor.