ʼn Lekker én goedkoop bakkie

Soos met enige tipe voertuig beweeg die bedryf deur fases. In ʼn stadium was piepkleinbuksies wat saggies aan die brandstof teug die ding om te hê. Deesdae is dit ʼn sportnutsvoertuig. Dis ʼn jammerte, want meeste van die sportnutsvoertuie ry nie so lekker soos hul sedan-eweknieë nie.

Bakkies het ook deur hul eie fases beweeg. Ek onthou toe alle bakkies plat was. Meeste van hulle enkelkajuit. Party langasafstand, en party kortasafstand. Toe word daar begin om die Hilux’e so hoog te bou. Dit was nog 2.2 viersilinderpetrolenjins. Hulle was stadig, én bitter dors.

Tans is die neiging na enorme krag, en hiperluukse bakkies. Ongelukkig gaan enorme pryse daarmee gepaard. Daar is heelwat bakkies tussen R900 000 en R1 miljoen. Party is al oor die miljoen. Mitsubishi het egter die antwoord.

Ons het onlangs tyd met ʼn Mitsubishi Triton 2.4 dubbelkajuit GL deurgebring. Hy het dieselfde enjin as sy duurder boeties, maar is net geprogrammeer met bietjie minder krag en toegerus met ʼn 5-spoed handrat en is dus heelwat goedkoper.

Die ontwerp is heel netjies. Aan die binneruim is gewone bekleedsel – geen leer nie. Ek hou baie daarvan, dis nie koud in die winter nie, en dit sweet nie in die somer nie. Die bestuursposisie is gemaklik, en die res van die kajuit is heel ergonomies uitgelê.

Die gewone luukshede soos elektriese vensters, lugreëling, ʼn raakskermklankstelsel met Apple CarPlay en Android Auto is daar. Aan die veiligheidskant is daar sluitweerremme met elektroniese remkragverspreiding en twee lugsakke.

Dit is alles net ʼn klein stukkie van die groter prentjie. Die harmonie van al daai dele is perfek. Die bakkie is lieflik gemaklik, en bitter lig op diesel. Die ratverhoudings is perfek gekalibreer dat die 5-spoed handrat lekker werk. Moenie dat die 100 kW jou bluf nie. Die bakkie voel heeltemal sterk genoeg en ry soos ʼn droom. Die 2.4 viersilinderturbodiesel bied 100 kW en 324 Nm. Die wringkrag is egter beskikbaar tussen 1 500 en 2 500 r/min. ʼn Pragtige strek in die toere om in te ry.

Die sleepkapasiteit op die bakkie word deurgegee as 1 400 kg. Heelwat minder as die 3 100 kg van die duurder Triton-model. Ek’t kers opgesteek by Mitsubishi en wou weet wat die rede daarvoor is. Het die goedkoper GL-model ʼn laer gehalte ewenaar, of sleepstang? Nee, dit is doodeenvoudig ʼn spesifikasie wat van Japan af kom weens die minder krag. Ek sal dan sê daar is geen rede hoekom dié Triton nie 2 000 kg kan sleep nie. Ek dink die manne by Mitsubishi in Japan is bietjie konserwatief met hul syfers.

Dié bakkie is werklik lekker. Én goedkoop! Gewoonlik beteken goedkoop sleg, maar nie hier nie. Daar is twee ander voordele. Dit is nie ʼn Hilux of ʼn Ranger nie – so dit is beslis ʼn laer risiko in terme van diefstal en kaping – so selfs jou versekering gaan minder wees. En minder pyn by die pomp. Daar is dus absoluut nie een ding fout met die bakkie nie. Kan ek ʼn witte kry, asseblief?

Die Triton-reeks lyk só:

Die kompetisie lyk só:

Tussen dié mededingers sal ek die Mitsubishi, Nissan, Isuzu of Toyota oorweeg. Die Ford word eersdaags vervang. Die Isuzu en Toyota lyk dalk duur – maar bied sewe lugsakke teenoor die res se twee.