Mitsubishi is geen nuwe handelsmerk in Suid-Afrika nie en het al deur die jare heen enorme sukses hier geniet. Die handelsmerk het egter deur ʼn moeilike tyd gegaan, maar vir die afgelope jaar lyk hul verkope belowend.
Mitsubishi se Outlander is werklik ʼn juweel – maar nog altyd heelwat onderskat in Suid-Afrika. Die Outlander PHEV het wêreldwyd talle toekennings verower en toe ek my vroeg vanjaar in Skotland en Ierland bevind, was die aantal Outlanders op die paaie verstommend.
Ons het nou uiteindelik die jongste model in Suid-Afrika beskikbaar. Ongelukkig steeds nie die PHEV-inprophibried nie. Werklik ʼn mooi motor. ʼn C-segment-sportnutsvoertuig met twee troefkaarte in sy mou – eerstens sy vierwielaandrywingstelsel en tweedens die derde ry sitplekke wat ʼn sesde en sewende sitplek bevat.
Terwyl die ontwerp mooi en stylvol is, is die binneruim luuks en ergonomies met ʼn enorme spesifikasievlak. Elke denkbare luuksheid is in die Outlander gestop wat dit uiters gemaklik maak om in die dorp die kinders mee te karwei – óf die langpad aan te durf!
Onder die kap sit ʼn nuwe 2.5-viersilinderpetrolenjin wat 135 kW en 245 Nm bied. Dit, gepaard met Mitsubishi se CVT-palwisseltransmissie, bied verbasend goeie brandstofverbruik. Aanvanklik, as mens se insette op die versneller nie egalig is nie, kan die ratkas vreemd reageer, maar sodra mens dit onder die knie het, werk dit piekfyn.
Die ritgehalte is puik, ten spyte van die 20″-sierwiele. Die 210 mm-grondvryhoogte is heel goed, naasbeste in sy klas agter die Forester se 220 mm. Jare terug, indien mens goeie ritgehalte gehad het, was goeie padhouvermoë nie moontlik nie. Die Outlander tref ʼn puik balans tussen die twee.
Ek sal die Outlander só opsom. Daar is amper geen C-segment-sportnutse met vierwielaandrywing én sewe sitplekke oor nie – mens moet dan na die groter D-segment-sportnutse soos Fortuner, Everest, mu-X en Pajero Sport kyk – en daai voertuie met dieselfde tipe spesifikasie kos heelwat meer. Dis ʼn puik voertuig en moet beslis oorweeg word indien jy in die mark is vir só ʼn tipe voertuig.
Die reeks lyk só:
| Mitsubishi Outlander 2.5 GLS | R729 995 |
| Mitsubishi Outlander 2.5 Aspire | R759 995 |
Die reeks word gedek deur ʼn 3 jaar/100 000 km-waarborg en 5 jaar/90 000 km-diensplan.
Die kompetisie lyk só:
| Nissan X-Trail 2.5 Acenta Plus 4WD | 135 kW/244 Nm | 7,8 ℓ/100 km | 3 jaar/150 000 km-waarborg 6 jaar/90 000 km- diensplan | R782 700 |
| Volkswagen Tiguan Allspace 2.0TSI 132 kW 4Motion Style | 132 kW/320 Nm | 8,9 ℓ/100 km | 3 jaar/120 000 km-waarborg 5 jaar/90 000 km- diensplan | R797 300 |
| Mitsubishi Pajero Sport 2.4 DiD 4×4 | 133 kW/430 Nm | 8,1 ℓ/100 km | 3 jaar/100 000 km-waarborg 5 jaar/90 000 km- diensplan | R819 990 |
| Isuzu mu-X 3.0TD LSE 4×4 | 140 kW/450 Nm | 7,6 ℓ/100 km | 5 jaar/120 000 km-waarborg 5 jaar/90 000 km- diensplan | R927 700 |
| Toyota Fortuner 2.8 GD-6 4×4 VX | 150 kW/500 Nm | 7,9 ℓ/100 km | 3 jaar/100 000 km-waarborg 9-dienste- diensplan | R942 900 |
| Ford Everest 2.0 BiTurbo Sport 4×4 | 154 kW/500 Nm | 7,5 ℓ/100 km | 4 jaar/120 000 km-waarborg Diensplan opsioneel | R1 020 300 |
Dit is almal sewesitplek-opsies. Die Mitsubishi, Isuzu, Toyota én Ford is almal leerraamvoertuie wat op bakkie-boeties geskoei is en bied ʼn totaal ander ervaring as die Outlander, X-trail en Tiguan. Daar is sewe sitplekke beskikbaar in die Peugeot 5008, maar sonder vierwielaandrywing en weer met vierwielaandrywing in verskeie C-sportnutse, maar sonder sewe sitplekke.
Wow, hoekom is dit so ongelooflik duur?
Ten spyte van die risikos, is die Toyota Fortuner 2.4 4×4 die beste keuse in die prysklas. Net sowat R3000.00 duurder 25kw minder krag maar 155nm meer krag. 4×4 soek krag nie kw nie!En BAIE beter herverkoop waarde. Nee wat, as die Outlander wil verkoop moet sy prys met so R100 000.00 sak!