Rav4-reeks geskommel …

(Foto: Verskaf)

Ons het verlede jaar ses weke met ʼn Rav4 GX-hibried deurgebring. Dit was ʼn besonderse ervaring en na my mening ʼn bitter slim strategiese skuif vir Toyota om hibriede voertuie so bekostigbaar moontlik beskikbaar te stel.

Toyota het nou ʼn effense U-draai gemaak. Die hele GX-reeks is verwyder. Die intreemodelle is nou albei GX-R-weergawes, een 2.0-petrol en ʼn 2.5-hibried. Dan is daar drie VX-modelle: 2.0-petrol, 2.5-petrol en 2.5-hibried. Die hele reeks, behalwe die 2.0-VX, geniet vierwielaandrywing.

Die Rav4-reeks se ontwerp is vir my steeds baie mooi. Japannees, dog stylvol. Die binneruim is ergonomies uitgelê – en die nuwe leerbekleedsel voorwaar luuks. Die bougehalte is ook fantasties aan die Rav4. Die binneruim is toegerus met ʼn magdom luukshede van digitale instrumente tot verkoelde sitplekke op die GX-R en verkoelde én verhitte sitplekke op die VX. Verder is klimaatbeheer, Apple Carplay en Android Auto, spoedkontrole en dies meer alles standaardtoerusting.

Ons het tydens die bekendstelling die 2.5-GX-R-hibried onder hande gehad. Die hele kragbron, petrol saam met die elektriese motors, bied 163 kW en 221 +e Nm. Dit is eintlik nie só eenvoudig nie. Die 2.5-petrolenjin bied 131 kW en 221 Nm. Die voorste elektriese motor bied 88 kW en 202 Nm, en die agterste elektriese motor bied 40 kW en 121 Nm. Mens kan wel nie alles bymekaartel nie, want dit hang af van hoeveel krag daar in die battery gestoor is. Versnelling word voorwaar sterk ervaar, al is die topspoed beperk tot 180 km/h.

Juis op die pad stel die Rav4 al sy troefkaarte ten toon. Egalige kraglewering, sterk versnelling, stil kajuit en sagte vering maak die Rav4 ʼn lieflike kar om te ry. Padhouvermoë is in die kol vir dié soort voertuig – en al die veiligheidstelsels wat standaard is, is gerusstellend.

Dit is vir my baie maklik om die nuwe Rav4-reeks op te som. Dis ʼn puik voertuig – veral die hibriede modelle waarmee ons nou al telkemale 6.2 l/100 km gehandhaaf het – ongeag bestuurstyl. Dit is egter ʼn jammerte dat die 2.5-GX-hibried van die reeks verwyder is, want hy was R100 000 goedkoper as die GX-R.

Die reeks lyk nou só:

Die reeks word gedek deur ʼn 3 jaar/100 000 km-voertuigwaarborg en sesdienste-diensplan. Hibriede modelle kry ʼn 8 jaar/195 000 km-batterywaarborg by.

Ons sal weer tyd met die Rav4-hibried deurbring en hom dán teen sy mededingers vergelyk.