Bakkies is stapelvoedsel in Suid-Afrika, soos braai, biltong, Bokke en brandewyn. Verkieslik nie almal saam nie. Die eerlike bakkies van my kleintyd soos ʼn Nissan 1400 is deel van die verlede. Deesdae kry mens dubbelkajuitbakkies wat hul man kan staan teen die luuksste sportnutsvoertuie in die bedryf.
Kom ons kyk na die duurstes:
Isuzu D-Max AT35 3.0 TD 4×4 | Ford Ranger 3.0 V6 EcoBoost Raptor 4WD | Volkswagen Amarok 3.0TDI V6 Aventura 4Motion | Jeep Gladiator 3.6 Rubicon | Ineos Grenadier 3.0 TD Quarter-master | |
Krag | 140 kW/450 Nm | 292 kW/583 Nm | 184 kW/600 Nm | 209 kW/347 Nm | 183 kW/550 Nm |
Brandstof- verbruik | 8,5 ℓ/100 km | 11,5 ℓ/100 km | 8,5 ℓ/100 km | 12,4 ℓ/100 km | 9,3 ℓ/100 km |
Ewenaarslotte | 2 | 3 | 2 | 3 | 3 |
Waad-diepte | 865 mm | 850 mm | 800 mm | 800 mm | 800 mm |
Sleepkapasiteit | 3 500 kg | 2 500 kg | 3 500 kg | 2 721 kg | 3 500 kg |
Waarborg en diensplan | 5 jaar/ 120 000 km waarborg 5 jaar/ 90 000 km diensplan | 4 jaar/ 120 000 km waarborg Diensplan opsioneel | 4 jaar/ 120 000 km waarborg 5 jaar/ 100 000 km omvattende instand-houdingsplan | 5 jaar/ 100 000 km waarborg 3 jaar/ 100 000 km omvattende instand-houdingsplan | 5 jaar/ 100 000 km waarborg Diensplan opsioneel |
Prys | R1 159 900 | R1 184 100 | R1 184 200 | R1 329 900 | R1 717 100 |
Die bakkies is almal hul onderskeie handelsmerke se vlagskipmodelle in die dubbelkajuitsegment. Almal kos meer as R1 miljoen, en die Ineos byna R2 miljoen, maar dié is gespesialiseerde gereedskap.
Die Isuzu is ʼn hardebaard-Arctic Truck met swaardiensvering en enorme wiele. Dit is ook die enigste viersilinderturbodiesel tussen dié mededingers.
Ford se Raptor het geen bekendstelling nodig nie – die warmste renbakkie van die lot. Byna 300 kW en ʼn brulgeluid uit die uitlaatpyp wat die hoendervleis oor ʼn mens se rug laat spoel. Daar is geen voertuig wat ʼn grondpad kan aandurf soos ʼn Raptor nie. Sy derde ewenaarslot voor maak die Raptor onstuitbaar op ʼn hindernisbaan.
Volkswagen se Amarok Aventura is ʼn pragtige bakkie. Die V6-diesel bied ʼn lekker golf wringkrag en die bougehalte is uit die boonste gestoeltes.
Jeep se Gladiator is ʼn prima speelding. Die enigste een tussen die klomp met ʼn swaaistang op die voorste as wat kan ontkoppel. Almal kerm oor hy swaar is op brandstof – maar in die werklikheid is hy nie só wild nie – beslis beter as die Raptor. Hy kan ook sy klere uittrek en sonder deure of dak in die modder gaan speel.
Die Quartermaster gaan uiters gewild wees in Suid-Afrika by diegene wat genoeg geld het. ʼn Doelgerigte ontwerp, puik binneruim met Recaro-sitplekke, BMW-enjin en -ratkas, Magna ewenaars – man, net die beste onderdele van spesialiste in hul veld.
Vroeg volgende jaar voeg ons ook die Land Cruiser-dubbelkajuit met ʼn 2,8 diesel en outokas by die lys.