Die beoordeling vir die jaarlikse Motor van die Jaar-kompetisie het onlangs op die Zwartkops-renbaan plaasgevind.
Daar is vanjaar 21 finaliste in die tien kategorieë waarin daar meegeding word. Daar is egter geen kandidate in de kategorie vir intreevoertuie nie. Dit is veral in die afdelings vir kompakte gesinsmotors, gesinsmotors en elektriese en hibriede voertuie waar sake kan warm raak met die meeste finaliste wat in die drie kategorieë meeding.
“Hierdie finaliste is die room van die oes in Suid-Afrika, en ons kan nie wag om te sien wie bo uitkom nie,” sê Mabuyane Mabuza, voorsitter van die 2023 Motor van die Jaar-komitee.
“Vanjaar se finaliste sluit ’n groter verskeidenheid handelsmerke in, wat die kompetisie baie meer opwindend maak.”
Die kategoriewenners en die algehele wenner van die Motor van die Jaar-kompetisie word op 1 Junie aangekondig.
Luikrûe
Die Renault Clio 5 is die enigste finalis in die kategorie.
Kompakte gesinsmotors
Hier sal vier voertuie sake uitspook. Dit is die BAIC Beijing X55, Nissan Qashqai, Opel Mokka en VW se Taigo.
Gesinsmotors
Vyf voertuie sal hier teen mekaar meeding. Dit is die Alfa Romeo Tonale, Chery Tiggo Pro 8, Honda Civic RS, Hyundai Tucson en Kia Sportage.
Luukse sportnutse
Die Jeep Grand Cherokee L en Kia Sorento sal mekaar in die kategorie die stryd aansê.
Sportnutse
Die Ford Everest is die enigste finalis in die kategorie.
Dubbelkajuitbakkies
Ford se Ranger en Isuzu se D-Max sal sake uitspook om as die bakkiekoning gekroon te word.
Luukse motors
Mercedes-Benz se S-klas is die enigste finalis in die kategorie.
Verrigtingsmotors
Die Audi RS3 is die enigste finalis in die kategorie.
Elektriese en hibriede voertuie
Die Audi e-tron GT en RS e-tron GT, die Haval H6 Hybrid, die Toyota RAV4 E-Four en die Volvo XC40 P8 Recharge ding in die kategorie mee.