Ek het al tot vervelens toe geskryf oor Duitse motors en hul uitermatig harde vering. Nie net op sportiewe sedanmotors nie, maar selfs luikrûe en groot sportnutsvoertuie. Laasgenoemde is juis bedoel om prakties te wees. Gemaklik, met plek vir die hele gesin – goeie grondvryhoogte en ʼn lekker sterk enjin.
Mercedes-Benz het so pas die jongste opknapping aan sy GLE-reeks hier in Suid-Afrika bekendgestel. GL is sy sportnutsreeks, met die volgende klasse: A is die kleinste, B is die 7-sitplek- kompakte nutsbuks, C is die middelslag-gesinsvoertuig, E die luukser groot familiemotor en S sy heel luuksste en grootste nutsvoertuig. Jy kan amper sê dit het alles begin by GLE – jare gelede in die vorm van die ML in die Jurassic Park-flieks.
Die jongste opknappings behels ʼn aantreklike ontwerp, veral die voorste aansig. Die nuwe ligte lyk werklik mooi. Die binneruim is grootliks onveranderd, maar die nuwe stuurwiel is baie mooi en sy funksies intuïtief. Die nuwe MBUX-sagtewarestelsel is ook heelwat meer gebruikersvriendelik.
Onder die kap is dit egter waar die werklike verskil inkom. Die nuwe 450d-V6-turbodieselenjin is puik. Gepaard met die 48 V-hibriedstelsel werk dit voorwaar goed. Dié V6 bied 270 kW en 750 Nm, met ʼn bykomende hupstoot van 15 kW en 200 Nm vanaf die hibriede motor. ʼn 9-spoed- outomatiese ratkas voorsien krag aan al vier wiele. Mercedes-Benz beweer ʼn brandstofverbruiksyfer van 8.6 l/100km. Ons het tydens die bekendstellingsroete 9.3 l/100 km gehandhaaf.
Die tweede en moontlik grootste troefkaart in die Merc se mou is die ritgehalte en padhouvermoë. Ons GLE 450d Coupé 4Matic het op 20″-wiele met 275/50/20-bande gery. Die soepel rit was werklik indrukwekkend en ʼn reuseverbetering op enige Duitse sportnuts waarmee ek onlangs gery het, behalwe dalk Merc se eie GLC 220d. Oor die Robinsonpas tussen Hartenbos en Oudtshoorn wys dié GLE vir ons ʼn paar dinge. Nie nét is sy rit soepel nie, maar daar is geen bakrol as jy hom haastig in ʼn draai injaag nie. Mens kies eenvoudig ʼn koers en die GLE hou perfek daai lyn, sonder bakrol – mét ʼn soepel rit. Dit kán gedoen word.
Die GLE-reeks bied ʼn enorme veiligheidspesifikasie: nege lugsakke, sluitweerremme met elektroniese remkragverspreiding, vastrap en stabiliteitsbeheer. Dan kom die magdom aktiewe stelsels soos baandwaal en blindekolwaarskuwing, asook botsingwaarskuwing met noodremhulp ook nog by.
Ons het ook tydens die bekendstelling met die gewone GLE – nie die koepee nie – gery. Hy word aangedryf deur ʼn 2.0-viersilinderturbodiesel en 48 V-hibriedstelsel. Dié enjin bied 198 kW en 550 Nm. Die 300d geniet ook die hibriede motor se hupstoot van 15 kW en 200 Nm. Ongelukkig is dié eenheid met 21″-wiele toegerus en bande wat 3 bar gepomp was. Dit is presies die soort voertuig wat vir die Duitsers ʼn slegte reputasie besorg het.
Dié motors sal jou egter ongeveer R2 miljoen uit die sak jaag. Indien jy hierdie tipe geld kan uithaal, kan jy letterlik enige motor koop wat jou hart begeer – selfs ʼn Ferrari (al is dit tweedehands). Nietemin het Mercedes met die nuutste opknapping sy beste voet voor gesit. Die GLE hoef geensins vir sy mededingers terug te staan nie. Gaan toetsbestuur beslis een.
Die reeks lyk só:
Mercedes-Benz GLE300d 4Matic | 198 kW/500 Nm | 7.7 l/100 km | R1 964 600 |
Mercedes-Benz GLE300d 4Matic 7-sitplek | 198 kW/500 Nm | 7.7 l/100 km | R1 984 000 |
Mercedes-Benz GLE450d 4Matic | 270 kW/750 Nm | 8.6 l/100 km | R2 041 500 |
Mercedes-Benz GLE450d 4Matic 7-sitplek | 270 kW/750 Nm | 8.6 l/100 km | R2 060 900 |
Mercedes-Benz GLE450 4Matic | 280 kW/500 Nm | 10.8 l/100 km | R2 075 400 |
Mercedes-Benz GLE450 4Matic 7-sitplek | 280 kW/500 Nm | 10.8 l/100 km | R2 094 800 |
Mercedes-Benz GLE450d 4Matic Coupé | 270 kW/750 Nm | 8.6 l/100 km | R2 340 500 |
Die reeks word gedek deur ʼn 2 jaar/onbeperkte km- waarborg en 5 jaar/100 000 km- omvattende instandhoudingsplan.
Ons sal weer tyd met die GLE deurbring en hom dán teen sy mededingers vergelyk.