Vir party mense word ʼn voertuig meer as net ʼn ryding. Party is regtig lief vir hul tjorre. Daar is ook fases waardeur ʼn mens beweeg. In my jong dae was dit óf ʼn Golf óf ʼn Kadett. Hoe warmer hoe beter. Hoe meer die dinge geraas het, hoe beter. Ai… dankie tog ek het grootgeword.
Dan begin ʼn mens ʼn bietjie meer geld verdien, en só begin die voertuig veiliger, luukser en vinniger word. Ek is ʼn pa van drie kinders en ons is nou in die fase van kamp en gesinsvakansies. Daar is vir my min dinge so lekker soos om die gesin in ʼn lekker ryding te laai, die woonwa te haak en die pad te vat.
Ons gaan elke Junie/Julie-vakansie ATKV Eiland Spa toe, en het nou al die voorreg gehad om met verskeie sleepmotors te trek. Mitsubishi was gaaf genoeg om in Desember 2020 vir my ʼn Pajero Sport 2.4DI-D 4×4 Exceed te leen.
Die Pajero Sport is ʼn groot sportnutsvoertuig wat op ʼn leerraam sit – soos die drie ander mededingers in die segment, Fortuner; Everest en MU-X is hy óók op sy bakkieboetie – die Triton – gegrond.
Die Pajero Sport bied, soos die ander, sewe sitplekke, ʼn lekker sterk dieselenjin, ʼn outomatiese ratkas en vierwielaandrywing. Tussen die vier het die Pajero Sport die laagste sleepkapasiteit teen 2 700 kg, maar gelukkig weeg my woonwa net meer as ʼn ton. Ons het vir twee weke gekamp, so die voertuig en die wa was maar swaar gelaai.
Ons het op 20 Desember die pad gevat, N1-Noord uit Pretoria in Naboomspruit se rigting. Wel, Mookgophong, of Mookgopong – albei spellings word gebruik op bordjies in en om die dorp. Ja nee. Aanvanklik was ek nie uitgeboul nie. Die Pajero Sport het oorgenoeg krag – maar 15,2 ℓ/ 100 km teen 106 km/h is kwaai.
Ons het van die oord af ʼn hele paar keer die pad gevat dorp toe. Langs die oord is daar ʼn fantastiese grondpad tot in Naboom. Sonder die woonwa kry ons dadelik nader aan 10 ℓ/ 100 km – steeds nie fantasties nie.
Met die terugkeer huiswaarts gedra die Pajero Sport en wa hul sommer baie beter. Ons was seker net té swaar soontoe. Ons sleep weer so net oor 100 km/h en kry 12,5 ℓ/ 100 km. Daar was seker met die eerste sleeptog ʼn wilde kopwind.
As ek met die toetsmotors sleep, sleep ek aspris sonder my stabiliseerder om te voel hoe die onderstel hom gedra. Daar was geen merkbare geswaai nie, al kan ʼn dwarswind die sleepsel ʼn bietjie rondpluk.
Die Pajero Sport het ʼn puik klimaatbeheerstelsel en ʼn indrukwekkende veiligheidspesifikasievlak met sewe lugsakke. Daar is lugreëling vir die twee agterste rye sitplekke, en genoeg USB-poorte om ál die kinders se toestelle gelaai te hou.
Voor in die kajuit is daar Apple CarPlay en Android Auto wat die volwassenes besig hou. Die inligtingskerm wat ʼn mens kan verpersoonlik werk fantasties om vir jou presies te wys wat jy wil sien, en hoé.
Die Pajero Sport het om verskeie redes aan my hartsnare getokkel. Die Pajero Sport se 4×4 vernuf is waarskynlik die beste in ʼn klas saam met Toyota se Fortuner, dis ʼn puik sleepvoertuig én is nie een van die twee gewildstes (Toyota en Ford) nie… en bied dus ʼn kleiner diefstal- en kapingrisiko. Indien jy in die mark is vir só ʼn voertuig – gaan toetsbestuur beslis die Pajero Sport – dis ʼn puik sleepgenoot, al is hy effens swaar op diesel.
Die reeks lyk só:
Mitsubishi Pajero Sport 2.4DI-D outo | 133 kW/ 430 Nm | 8,1 ℓ/ 100 km | 7 lugsakke | 2,7 ton | R624 995 |
Mitsubishi Pajero Sport 2.4DI-D 4×4 outo | 133 kW/ 430 Nm | 8,1 ℓ/ 100 km | 7 lugsakke | 2,7 ton | R674 995 |
Mitsubishi Pajero Sport 2.4DI-D 4×4 outo Exceed | 133 kW/ 430 Nm | 8,1 ℓ/ 100 km | 7 lugsakke | 2,7 ton | R704 995 |
Die reeks word gedek deur ʼn 3 jaar/ 100 000 km waarborg en vyf jaar/ 90 000 km diensplan
Isuzu MU-X 3.0 4WD outo | 130 kW/ 380 Nm | 7,9 ℓ/ 100 km | 6 lugsakke | 3 ton | 5 jaar/ 120 000 km waarborg 5 jaar/ 90 000 km diensplan | R747 900 |
Toyota Fortuner 2.8GD-6 4×4 outo | 150 kW/ 500 Nm | 7,9 ℓ/ 100 km | 7 lugsakke | 3,3 ton | 3 jaar/ 100 000 km waarborg 9 dienste diensplan | R785 800 |
Ford Everest 2.0SiT 4WD XLT outo | 132 kW/ 420 Nm | 7,1 ℓ/ 100 km | 7 lugsakke | 3,1 ton | 4 jaar/ 120 000 km waarborg 6 jaar/ 90 000 km diensplan | R679 400 |
Brendon, miskien moet jy die brandstof syfers bietjie vergelyk met sy mededingers met dieselfde wa. Die 12.5 l/100km (8km/l) wat jy met die karavaan gekry het is gemiddeld vir die tipe voertuig met ‘n karavaan. Ek het al wyd en syd gelees maar beter gaan jy nie sommer kry nie.
Die 15 l/100km is ook darem nie normaal nie. Ek het met ‘n ou 3.2 Pajero gesleep (Palma) en as die wind regtig erg was van voor het ek dalk daar gedraai, dié kere kan ek egter op my een hand tel.