Verbruikersake: Antwoorde op jou vrae oor motorversekering

(Argieffoto)

Of jy nou jou eerste motor koop en of jy ʼn gesoute bestuurder is, daar is waarskynlik ʼn paar vrae wat jy oor motorversekering het. Ina Opperman het gaan kyk na die antwoorde wat die versekeraar Naked onlangs gegee het in ʼn vra-ons-enigiets-gesprek met volgelinge op Twitter. Die antwoorde is verskaf deur Ernest North, medestigter van Naked.

Waarom is motorversekering so duur en waarom het ek dit selfs nodig?

Omvattende motorversekering is ʼn veiligheidsnet wat jou beskerm as jou motor gesteel, beskadig of afgeskryf word, asook skade aan ʼn ander motor as jy ʼn ongeluk veroorsaak het. Solank jy aan die terme en voorwaardes van jou polis voldoen, sal jou versekeringsmaatskappy betaal vir die herstel of vervanging van jou motor as iets daarmee gebeur.

As die ongeluk nie jou skuld is nie, sal die versekeraar probeer om die geld van die verantwoordelike party te verhaal en jou bybetaling terugbetaal. As die versekeraar nie die koste van die ander bestuurder kan verhaal nie, sal hy betaal vir herstelwerk aan jou motor, afgesien van die bybetaling wat jy sal moet betaal.

Dit gee jou gemoedsrus, aangesien min mense tien- of honderdduisende rande op kort kennisgewing kan kry om vir herstelwerk te betaal of ʼn nuwe motor te koop.

Jy kan ook slegs derdeparty aanspreeklikheidsversekering koop, wat minder kos, en jou sal beskerm as jy ʼn botsing veroorsaak. Dit dek skade wat jy aan iemand anders se motor aanrig, soos as jy ongelukkig genoeg is om ʼn ongeluk met ʼn BMW M4 van R2 miljoen te hê. Dit beteken dat jy nie hoef te stres om gedagvaar te word as jy ʼn ongeluk veroorsaak nie, maar jy sal nie verseker wees vir skade aan of diefstal van jou eie voertuig nie.

Omvattende versekeringsdekking sluit altyd derdeparty-aanspreeklikheidsdekking in. Dit is belangrik as jy jou motor nog afbetaal of nie kan bekostig om dit te herstel of te vervang as iets gebeur nie, maar jy moet vasstel wat die beste vir jou en jou beursie werk.

Maar gegewe die finansiële risiko’s om nie verseker te wees nie en die beskikbaarheid van bekostigbare digitale versekeringsopsies, is dit steeds meer finansieel wys om gedek te word. North beveel aan dat jy ten minste derdeparty-versekering koop as jy nie omvattende dekking kan bekostig nie.

Waarom is my versekeringspremie hoër as my ma of my vriend s’n, al ry ons dieselfde motor?

Volgens North is jou premie gebaseer op hoe waarskynlik dit is dat jy sal eis en hoeveel daardie eis sal kos. Jou versekeringsmaatskappy sal dit bepaal deur historiese data en algoritmes te gebruik om te bepaal hoe hoog die risiko’s is dat jy in ʼn ongeluk sal wees of dat jou motor gesteel sal word.

Hierdie algoritmes sal data soos waar jy ry, jou ouderdom en bestuurservaring, jou kredietrekord en jou vorige eise gebruik om jou risikovlak te bepaal. Iemand wat minder bestuur, langer ʼn lisensie gehad het en vir 10 jaar nie geëis het nie, sal ʼn laer premie kry omdat die algoritmes sal voorspel dat hulle baie minder geneig is om in ʼn ongeluk te wees.

Iemand wat baie bestuur, die afgelope jaar in ʼn ongeluk was en net twee jaar ʼn lisensie het, kan ʼn bietjie meer betaal omdat daar ʼn groter waarskynlikheid is dat hulle in ʼn botsing sal wees. Jou premie sal ook bedrae insluit om die versekeraar se bedryfskoste, ʼn mate van wins en die kostevoordele soos terugbetalings te dek.

Ek was in ʼn ongeluk en dit was nie my skuld nie, maar ek moes steeds ʼn bybetaling betaal. Waarom?

Wanneer jy in ʼn ongeluk was, sal jou versekeraar probeer om jou so gou as moontlik weer op die pad te kry, maar dit kan ʼn paar weke of maande nodig hê om te ondersoek wie in die ongeluk skuldig was. Indien vasgestel word dat die ongeluk die ander bestuurder se skuld was, sal jou versekeraar probeer om die skade van die derde party of hul versekeraar te verhaal.

Dit kan ʼn lang regsproses wees, maar as die versekeraar suksesvol is om die geld te verhaal, sal jou bybetaling terugbetaal word. Met die aantal onversekerde bestuurders op die pad, is daar ook geen waarborg dat jou versekeraar jou bybetaling sal kan verhaal nie. North beveel aan dat jy ʼn bybetaling kies wat jy kan bekostig om maklik te betaal, sodat jy vinnig weer op die pad kan wees as iets met jou motor gebeur.

Betaal jy hoër premies vir motors wat ʼn groter risiko het om gekaap te word?

Dit is waar dat sommige motors meer gesteel word as ander, maar baie mense oorskat hoeveel die risiko van diefstal bydra tot hul premies. Die meeste van jou premie word gebruik om die risiko’s van ongelukskade te dek. Jou risiko kom neer op ʼn kombinasie van faktore: waar jou motor die meeste van die tyd geparkeer is, misdaadpatrone in die omgewing en jou bestuurspatrone, soos gereelde lang ritte of as jy laat snags rondry.

Sommige gewilde motors kan in meer ongelukke of diefstalle betrokke wees, maar dit is dikwels ook omdat daar meer van hulle op die pad is. As jy nuuskierig is oor hoe die motor wat jy kies jou premie sal beïnvloed, kan jy probeer om aanlyn kwotasies vir premies vir verskillende fabrikate en modelle te kry.

My motor verloor waarde, maar waarom daal die premie nie?

Dit is so dat jou motor waarde verloor namate die tyd verbygaan, dus word dit goedkoper om dit te vervang, maar met die meeste eise sal jou versekeraar jou motor moet herstel eerder as om dit te vervang. Verskeie faktore soos inflasie, wisselkoerse vir ingevoerde onderdele en ander faktore kan veroorsaak dat die herstelkoste mettertyd styg, wat veroorsaak dat jy dieselfde premie of ʼn hoër premie vir ʼn motor met ʼn laer waarde betaal. As jy dink jy betaal dalk te veel, vra ander versekeraars vir kwotasies en kyk of jy ʼn beter aanbod kry.