Argieffoto
“Die lughawe funksioneer normaal. Daar is geen probleem nie,” het woordvoerder Solomon Makgale gesê. Acsa is Donderdag deur die Brandstofkonsortium ingelig dat die brandstofpypleiding van die Nasionale Petroleum Raffinaderye van Suid-Afrika se raffinadery in Sasolburg (Natref) besoedel is met brandstof wat nie aan die spesifikasies voldoen nie.
Voorraadvlakke van vier dae by die lughawe is tot 1,6 dae verminder.
“Mense kan maar na die lughawe toe kom,” het Makgale bygevoeg. Enige veranderinge aan die situasie sal aangekondig word. Dit blyk of die besoedeling opgespoor is voordat die brandstof in vliegtuie beland het. Verskaffers sal nou ondersoek hoe dit plaasgevind het. Die lughawe ontvang gewoonlik drie miljoen liter brandstof per dag deur die Natref-pypleiding.
Die lughawe bedien sowat 17 miljoen plaaslike en internasionale passasiers per jaar.
