Een dood, talle beseer na skoolbus teen muur bots

ʼn Vrou is dood en 19 mense, waaronder 18 skoolkinders, is beseer toe ʼn skoolbus teen ʼn veiligheidskompleks se muur gebots het in Krugersdorp in die Wes-Rand.

Santi Steinmann, woordvoerder van Netcare911, sê die busbestuurder het glo beheer verloor waarna die bus teen die veiligheidskompleks se muur gebots het. “Een vrou is dood terwyl nog ʼn passasier ernstig beseer is en per helikopter na ʼn nabygeleë hospitaal geneem is vir verdere behandeling. Die ander beseerdes het ligte tot meer ernstige beserings opgedoen en is ook na nabygeleë hospitale geneem vir verdere behandeling.” Steinmann sê brandbestryders moes meganiese toerusting gebruik om die bestuurder uit die bus te bevry.