(Argieffoto: Rapitse Montsho/Flickr)
“Dit is ʼn groot verantwoordelikheid om ʼn land te regeer. Die regering moet die beste kaders hiervoor inspan.”
So het pres. Cyril Ramaphosa die afgelope naweek by die ANC se verjaardagviering gesê. Dit is regtig die moeite werd om ʼn oomblik uit jou dag te neem en die lagwekkendheid hiervan te waardeer – en hardop daaroor te lag.
Dit is dieselfde as om met ʼn donkie by die Durban July op te daag, herhaaldelik vér te verloor en dan tot die gevolgtrekking te kom dat jy net ʼn vinniger donkie volgende keer moet inskryf. Die probleem was nooit die kwaliteit van die donkie waarmee jy verloor het nie – die probleem is dat jy met donkies teen volbloed resiesperde probeer kompeteer.
Ramaphosa se toespraak is sprekend van die ANC vandag. Die party is heel goed daarmee om die probleme van die land te identifiseer: korrupsie, ondoeltreffendheid van die regering, swak ekonomie en die regering se swak geloofwaardigheid onder landsburgers. Tog het hulle bloot nie die vermoë om die kernoorsake daarvan te identifiseer nie. Al wat hulle kan doen is om oppervlakkige “oplossings” te bied wat aan die simptome aandag probeer gee, eerder as om die siekte self te teiken.
Ramaphosa se stelling is presies dieselfde as die stelling waarmee sosialiste vorige mislukkings van dié ideologie probeer verdedig: “Dit was nie regte sosialisme nie.” Sosialiste glo werklik dat sosialisme en kommunisme net in die verlede misluk het omdat dit nie reg uitgevoer is nie. Die fout lê altyd net by die implementering, eerder as die idees self.
Pres. Cyril Ramaphosa. Foto: Kopano Tlape/GCIS
Die ANC glo werklik dat ons probleme veroorsaak is deur die swak implementering van hulle goeie idees. “Kaderontplooiing self is nie die probleem nie – in die verlede het ons net nie die régte kaders ontplooi nie,” meen die ANC. Hulle verstaan egter nie dat kaderontplooiing een van die grootste redes vir ons land se huidige toestand is nie. Die oomblik wat jy partylojaliteit bo bevoegdheid stel, gaan jy noodwendig verval tot ʼn staat verlam deur onbevoegdheid en patronaatskap.
Die ANC se 109de verjaardag word vanjaar saam met die SAKP se 100ste verjaardag gevier. Ons vergeet soms die absolute absurditeit daarvan dat ʼn openlike kommunistiese party een van die ANC se grootste bondgenote is.
Kommunisme is ʼn ideologie wat ná die val van die Sowjetunie van grootskaalse geloofwaardigheid gestroop is. In die 20ste eeu is dié idees nog as populêr, modern en vooruitstrewend gesien. Ná die Koue Oorlog het die grootste en omvattendste implementering daarvan tot ʼn val gekom. Vandag probeer verskeie politici en lande kommunisme nog in verskillende gedaantes laat herleef: hetsy deur dit “demokratiese sosialisme” te noem, die rasse-Marxisme van bewegings soos Black Lives Matter, die “groen kommunisme” van rolspelers soos Gretha Thunberg of China vandag. Hierdie is alles bewegings wat nog vasklou aan ou idees – nie omdat dit noodwendig goeie idees is nie. Dit is eerder uit ʼn soeke na mag gekombineer met ʼn blinde naïwiteit teenoor die verlede.
Die bondgenootskap met die SAKP spreek ook daarvan dat die ANC ʼn uitgediende organisasie met uitgediende idees is. Hulle klou nou al vir 109 jaar aan presies dieselfde idees vas. Hulle jaag ook kommunisme na onder die vaandel van dinge soos Swart Ekonomiese Bemagtiging, Nasionale Demokratiese Rewolusie en sentrale beheer van alles.
Dit beteken ook dat ʼn toekoms onder die ANC vanselfsprekend sleg lyk. Die party sál volstaan met idees wat van die grootste humanitêre krisisse in die geskiedenis veroorsaak het. Ná 26 jaar aan bewind het die party nog net nader aan, eerder as verder van, dié idees beweeg. Selfs tydens ʼn pandemie moes hulle vasklou aan hierdie idees. Hulle móés entstowwe nasionaliseer. Hulle móés in die verspreiding daarvan swart besighede voortrek.
Ten spyte van die feit dat die ANC se kommunistiese en sentralistiese idees al herhaaldelik misluk het, stel hulle nie werklik in nuwe idees belang nie. In die sogenaamde idee-oorlog verloor hulle nie net herhaaldelik nie, maar leer hulle ook nie uit die nederlae nie. Dit beteken dat nuwe oplossings en ʼn beter toekoms nie by die ANC se idees lê nie, maar by ander idees.
Dit is soms moeilik om oor idees en politieke teorieë om te gee wanneer dit in ʼn mens se wêreld en werklikheid só sleg gaan soos wat tans die geval is. Gewone mense word weens die ANC se absolute onbevoegdheid gedwing om hulle daagliks oor basiese goed soos finansiële oorlewing, veiligheid, gesondheid en opvoeding te bekommer.
So ook is dit moeilik om die belangrikheid daarvan raak te sien om aan die sogenaamde idee-oorlog deel te neem wanneer die drukkende probleme in jou lewe stewig in die werklikheid gesetel is. Dit is egter baie belangrik om te verstaan waarom dit letterlik lewensnoodsaaklik is om nie net oor die idee-oorlog om te gee nie, maar ook om seker te maak jy wen.
Indien goeie idees nagejaag word, met die veranderende politieke konteks in gedagte, kan beter werklikhede vir ʼn beter toekoms geskep word. Selfs ten spyte van die groot las wat die ANC is, is ʼn beter werklikheid en beter toekoms moontlik.
Die ANC gaan nie sommer van plan verander nie. Daarom is dit belangrik om alternatiewe (en beter) idees na die tafel te bring. As ons op die regering gaan staatmaak, gaan ons saam met hulle in die argaïese idees en slegte uitkomste vasgevang bly.
Indien ons vir alternatiewe idees veg en dit implementeer, kan ons vir onsself ʼn beter wêreld skep. ʼn Wêreld waarin die “beste kandidaat” eerder as die “beste kader” voorkeur geniet. ʼn Wêreld waarin normaliteit voorkeur geniet.
Voordat daai donkie weer ingeskryf word, sal die jokkie die skuld kry, dan die veearts, dan die kos wat hy eet, dan die ouens wat die kos maak, dan die mense wat hom moet voer, dan die saal, en so kan ek aan gaan. En ons word verwag om alles te glo!
Neeeee hulle sal nie die veearts , kos of saal blammeer nie. Dit is te oorspronklik. Hulle sal Apartheid blameer
Spot on. Verduidelik dit nou net aan ” my fellow South Africans”! Solank SASSA vir hulle sorg, sal die ANC in bewind BLY.
Ja vir “our people” is die ANC die goue kalf
Dit gaan my verstand ten bowe. Ek kan dit nie verwerk wat tans aan die land aangaan nie. Is daar nog ‘n funksionele departement wat nie aan grootskaalse onbewoegdheid skuldig is nie. Die Dunning – Kruger effek is aan die orde van die dag. Sirrel die Sqwirrel moet ook nie met sy sielkunde “fellow Souf Efrikens” begin nie. Ons is nie meer almal onnosel nie. Een ding weet ek verseker elke dag is ‘n dag nader aan hul val.
Baie goeie vergelyking die donkie en die resiesperd. Baie goeie artikel!
Wat het gebeur met al die ANC “intelectuals” of nou “intellektueles” van 1990? Soos die jare aangegaan het die in die ANC net dommer en dommer geword, of liewers die IN die ANC. Dink net die dommes in die ANC as hulle vir ‘n 1000 jaar regeer! Dink naie maal self Cyril Ramaphosa het dommer geword sedert 1990.
Diè man is so ongelooflike teleurstelling. Ek was een van die mense wat gedink het hy kan dalk positiewe verandering bring. Helaas …
Hartseerverhaal episode 900
Nee wat ons ken hom van die myne in Carletonville. Altyd die ‘ smooth talker ” maar niks anderste. Ken mos die myn” our people ” unie – WE DEMAND OR ELSE. Luiperd verander nie sy ‘ spots” nie
Cyril is niks van my nie. Hy respekteer nie my nie en wil my en ander sakemanne, die publiek , boere en ander se belasting geld invorder maar almal genoem uitsluit van vordering of beter lewe as gevolg van velkleur! Rassistiese Politieke ……….
Skote Pretoors!!!Baie goeie uiteensetting. Jy verdien ‘n kop koffie en ‘n gesprek.
Man julle ANC kommuniste is brein dood en klaar. Waar is die mense wat in 1994 gestem het vir die sirkus wonder wat het hulle te se. Seker maar soos die ANC praat baie en doen niks.
Gaan soek bietjie ‘n video op youtube met die titel “Her name is Miss Ann”. Die eerste deel is effens vervelig totdat die pastoor by mandela uitkom. Gaan kyk gerus, die waarheid is oop en bloot.
Die ANC het blykbaar NIKS geleer tydens hulle jare van “exile” nie. Ten volle kommunistiese lande soos die Sowjetunie, Pole, Hongarye en veral Oos-Duitsland, was SONDER goed soos beurtkrag, plakkerskampe, swak vuil staatshospitale, lae standaard onderwys waar leerders onderwysers amper mag aanrand, swak of geen munisipale dienslewering ens ens. Daardie lande was nou nie wonderlik nie, maar klomp goed wat in SA nie werk nie, het 100% perfek daar gewerk. Die ANC het egter daardie lande gebruik NET om te moan oor hoe sleg die wit regering van SA was, terwyl hulle NIKS geleer het van hoe om ‘n land in stand te hou nie. Eks seker daarvan dat, waar Karl Marx, Lenin en Stalin ook al vandag in die hiernamaals is, sit en lag hulle vir die ANC.
Kommunisme is ‘n reaksie teen die ongelykheid en onregverdigheid wat sekere aspekte van die huidige vorm van Kapitalisme meebring, i.e. die vermoe om inkomste uit steriele bates (rente, o.a.) te verdien. Nietemin, kommunisme verwyder enige menslike iniatief en aansporing tot harde werk of kreatiwiteit weens die gebrek aan privaatseiendombesit. Dit lei na onderdrukking, hongersnood en konflik.
“Die regering moet die beste kaders inspan”. Dis nie so vreemd nie. Dit het in die ou SA ook gebeur met aanstellings van Broederbonders in top poste in die staatsdiens. Toegegee, bekwaamheid het toe ‘n baie groter rol gespeel, maar feit bly staan dat ander bekwame kandidate wat ook die werk goed kon doen, uitgeskakel is NET omdat hulle nie Broederbonders en stoere Nasionale Party ondersteuners was nie. Gaan lees net die stuk oor Gideon Roos op die Afrikaanse Wikipedia. Daar staan alles duidelik: hoe die Broederbond gekonkel het en vir Roos as direkteur-generaal van die SAUK uitgewerk het, om een van hulle mede-Broeders in sy pos te kry.
Op vergaderings van die Broederbond se hoofraad is ook besluite geneem dat hulle aktief lede moes werf onder Afrikaanse skoolhoofde en predikante van die 3 Afrikaanse susterkerke,want dit is beroepe waarin die Afrikanervolk se jeug en volwassenes beïnvloed kon word dat NET die Nasionale Party alle wysheid in pag het.