11-jarige vas wat op bewegende treine speel

‘n Skermgreep uit die video wys hoe die kinders op die treine speel en mense op die spoorlyn stap.

Die polisie het ʼn 11-jarige vermeende bendeleier in hegtenis geneem nadat hy glo sy maats aangehits het om op die bewegende waens van Transnet se vragtreine op die noordelike spoorlyne in KwaZulu-Natal te spring.

Steve Harris, algemene sekretaris van die vervoervakbond Untu, het gesê die seun is intussen in die sorg van sy ouers vrygelaat. Hulle moet later weer saam met hom in die hof verskyn.

Untu sê die jong bende skep ʼn ernstige veiligheidsrisiko. Harris het verskeie video’s ontvang oor die speletjie.

Treine op die spesifieke roete moet by ʼn spoedbeperking van 15 km/h hou omdat dit deur ʼn gebied ry waar voetgangers die treinspoor gereeld oorsteek sonder om te kyk, of moontlik nie die spoed van aankomende treine besef nie.

In die afgelope boekjaar is 375 sterftes en 2 660 beserings op spoorweë aangemeld, het die Spoorwegveiligheidsreguleerder vroeër bekend gemaak. Daar was terselfdertyd ʼn toename van 36% in veiligheidsverwante sterftevoorvalle.

Untu betwis dié syfers en glo dit is veel hoër, hoewel hy sê dié syfers op sigself is rede tot groot kommer.

‘n Skermgreep uit die video.

“Ouers moet hul kinders leer dat dit nie grappies is om naby ʼn spoorlyn te speel nie, om nie eens te praat van ʼn bewegende trein nie. Die kinders plaas nie net hul eie lewe in gevaar nie, maar ook dié van die treindrywer en -assistent. Hulle word gedwing om die kinders wat op die waens speel, dop te hou – pleks daarvan om hul oë op die spoorlyn en sinjale te hou,” het Harris gesê.

“Om sake te vererger gaan dit die drywer en assistent wees wat aangekla word as die kinders iets oorkom. Die plaas ook hul werk in die gedrang. Dit neem ook glad nie die emosionele trauma in ag waardeur ʼn treindrywer en -assistent gaan as hulle nie ʼn besering kan verhoed nie.”

Harris sê dit is onaanvaarbaar dat wetteloosheid die vlak bereik het waar kinders dink hulle kan wegkom met speletjies soos dié.

Untu sê die Spoorwegveiligheidsreguleerder moet bewusmaking in die omgewing skep en gemeenskappe onderrig oor treinveiligheid. Die gemeenskap moet ook die betrokke kinders identifiseer en met hul ouers oor die gedrag praat.

Harris het ʼn beroep op Untu se treindrywers gedoen om soortgelyke voorvalle dadelik aan te meld, sodat die vakbond kan verseker dit word ook by die polisie aangemeld om gepaste optrede te verseker.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

21 Kommentare

jongste oudste gewildste
Ben

Hoe kom werk die video nie?

Pitbul

Want dis ñ skermgreep Ben.

Henry

n Ouer wat sy kind dissapline leer behoort te weet waar sy kind is. Ouers van vandag is self nog kinders – sonder enige respek vir ander of hulself.

Tiger

Iemand het seker eendag in ‘n grap vir sy kind gese “gaan speel op die treinspoor!” Nou pluk hul die vrugte.

Pampoen.

Maar laat die treine ‘n behoorlike spoed ry. Dit sal voirkom dat hulle sulke dom dinge doen en net dalk sal hulle leer om ‘n trein te respekteer. Nou is dit ‘n grap vir hulle. Daar moet opghou word om alles aan te pas om mense wat nie wil leer te akkommodeer. Dit is al ‘n siekte in SA. Kyk maar hoe ignoreer hulle die voetoorgang brue wat gebou word.