Die Nasionale Seereddingsinstituut (NSRI) het Vrydag in die vroeë oggendure 26 bemanningslede gered toe hul boot naby Kaappunt aan die brand geslaan het.
Woordvoerder Craig Lambinon sê die NSRI Simonstad is omstreeks 00:40 ontplooi ná berigte ontvang is van ʼn 35 meter lange Houtbaai-gebaseerde ondersteuningsvaartuig wat suid van Kaappunt in ligte laaie gestaan het.
Die maritieme reddingskoördineringsentrum (MRCC) en Telkom- maritieme radiodiens het reageer op die brand en alle vaartuie in die gebied is in kennis gestel.
Die vragvaartuig Aquaexplorer en vissersboot Umfondini is vir bystand ontbied.
Die 26 bemanningslede het in ʼn lewensreddersboot hul vaartuig verlaat. Hulle is deur Umfondini bygestaan.
“NSRI Houtbaai is ook ontplooi en hulle het twee reddingsvaartuie uitgestuur.”
Die bemanningslede is nie beseer nie en almal was veilig op die Umfondini. Hulle is na Buffelsbaai gebring waar hulle op die NSRI Simonstad se reddingsvaartuig Donna Nicholas oorgeplaas is. Van daar is hulle na NSRI Simonstad geneem en uiteindelik veilig terug vervoer na Houtbaai.
Die oorsaak van die brand is nie bekendgemaak nie.