3-jarige deur honde verskeur

Argieffoto: Pixabay

Die provinsiale polisiekommissaris in Limpopo het ʼn beroep op ouers en voogde gedoen om met meer sorg na hul kinders om te sien nadat ʼn driejarige dogtertjie van Mahwelereng buite Mokopane die afgelope naweek dood is toe sy deur honde verskeur is.

Kol. Moatshe Ngoepe, woordvoerder van die polisie, sê die voorval het Saterdag omstreeks 22:00 gebeur in Sone 1 van Mahwelereng.

Volgens Ngoepe het die 36-jarige ma haar kleuterdogtertjie saamgeneem na ʼn plaaslike taverne. “Toe sy by die taverne aankom, het sy glo die kleuter op ʼn bed in ʼn ander vertrek laat slaap en toe by die taverne ingegaan. Die klein dogtertjie het wakker geword en gedwaal na die erf agter die taverne waar sy deur honde aangeval is.

“Klante in die taverne het haar te hulp gesnel. Die kind is na ʼn hospitaal geneem, maar is by haar aankoms daar dood verklaar.”

Ngoepe sê die moontlikheid bestaan dat ʼn aanklag van kinderverwaarlosing teen die kind se ma aanhangig gemaak kan word, maar in die stadium is geen aanklagte nog geopen nie.

Lt.genl. Nneke Ledwaba, provinsiale polisiekommissaris, het gesê om ʼn kind na ʼn kroeg toe te neem is onaanvaarbaar en iets wat nooit moet gebeur nie. “Lede van die gemeenskap, veral ma’s en voogde, word aangemoedig om altyd hul kinders se veiligheid eerste te stel,” het Ledwaba gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
Koos

Kla die ma ook krimineel aan. Wat soek sy by ‘n kroeg met haar 3 jarige? 22:00 in die aand? Die ma het haar kind in die posisie geplaas.

Illse

Dit is baie hartseer. R.I.V kindjie, maar hoe neem ‘n ma ‘n kind na ‘n taverne toe 22:00 in die nag en laat haar in ‘n aparte kamer slaap op haar eie met mense om jou wat jy skaars ken. Stappe moet teen daardie ma geneem word.

Adrian Van Straaten

ek’t die berig oor en oor gelees.
ons was ook jonk, ons het ook gejol!
die kinders was liefs by ouma gelos anders was dit ‘n “volgende keer”
die ma het nie eers nodig om skuldig te bevind word, sy betaal reeds die hoogste prys
RIV kleinding

toy

Ek dink die ma gaan haarself verwyt die res van haar lewe.

se net

Net een woord, kultuurverskille. Dalk was die ma nog met die kind se staatshulp daar.