Argieffoto ter illustrasie. (Foto: Unsplash)
Minstens 50 mense is Vrydagoggend beseer in ’n gasontploffing in Olifantsfontein naby Midrand.
Russel Meiring, woordvoerder van ER24, het gesê paramedici is net na 07:00 na die toneel op ʼn sakeperseel in Industrystraat ontbied.
By hul aankoms op die toneel was die gebou reeds ontruim en het beseerdes buite gelê.
Volgens Meiring het niemand ernstige beserings opgedoen nie en die tientalle beseerdes is op die toneel behandel voordat hulle na nabygeleë hospitale vervoer is vir verdere behandeling.
Omstandighede rakende die voorval is onbekend. Plaaslike owerhede ondersoek die voorval.
