83% sê ‘ja’ vir staking by Sasol oor wit uitsluiting

Sasol se Secunda-aanleg. Foto: Jóhni Steenkamp

Altesaam 83% van Solidariteit se lede by Sasol in Secunda het ja gestem vir ʼn staking teen die maatskappy se uitsluiting van wit werknemers uit ʼn personeelaandeleskema. Solidariteit-lede by Sasolburg se aanlegte sal op Maandag 27 Augustus oor die aangeleentheid begin stem.

Dit sal die eerste keer in Suid-Afrika se geskiedenis wees dat wit werkers oor rasse-uitsluiting staak. Afgesien van die staking beplan Solidariteit ook ʼn nasionale protes waaraan mense landswyd sal kan deelneem.

Volgens dr. Dirk Hermann, bestuurshoof van Solidariteit, is die Sasol-kwessie ʼn gevallestudie oor die uitsluiting wat wit mense oor die algemeen ervaar.

“Ons gaan ʼn reuseveldtog van stapel stuur waardeur mense die Sasol-werkers sal kan steun. ʼn Spesiale blad is op www.solidariteit.co.za geskep waar mense dié werkers kan steun,” het Hermann Sondag gesê.

“Steun vir die staking is oorweldigend. Dit dui op die vlakke van frustrasie onder ons lede. Sasol het net eenvoudig té ver gegaan. Die reël wat ten opsigte van personeelaandeelskemas by ander maatskappye geld, veral in die mynbedryf, is dat alle werknemers daarby ingesluit word, ongeag ras. Die onderliggende boodskap wat ons uit ons lede se antwoorde kry, is dat genoeg genoeg is!” het Hermann gesê.

Herman het gesê dié aksie spruit nadat Sasol ʼn bemagtigingskema, Khanyisa, afgekondig het wat aandele ter waarde van R500 000 aan sy swart werknemers toeken. Khanyisa volg op die Inzalo-skema wat finansieel misluk het. Inzalo het wel wit werknemers ingesluit.

“In praktyk beteken dit dat ʼn wit Sasol-werknemer wat 30 jaar by Sasol werk, geen voordeel kry nie, maar ʼn werknemer wat drie maande by Sasol werk, kry R500 000. Werkers wat dieselfde werk doen, kry verskillende voordele. Die besluit van Sasol gaan werkers in rassekampe verdeel en gaan rassespanning opjaag,” het Hermann gesê.

Hermann het gesê die konsepmynbouhandves wat onlangs in die Staatskoerant vir kommentaar gepubliseer is, maak dit duidelik dat ʼn personeelaandeelskema inklusief moet wees en nie werkers op grond van ras mag verdeel nie.

“Die manifes maak net voorsiening vir werknemers wat reeds deur aandeelskemas vergoed word. Ras is nie ʼn kriterium nie. Sasol se skema druis lynreg in teen die mynbouhandves en die praktyk in die bedryf. Hul skema is ʼn onbuigsame rasseskema wat net ten doel het om bemagtigingspunte te kry. Dit gaan nie oor die bemagtiging van werkers nie, maar oor die kommersiële waarde van ʼn telkaart,” het hy bygevoeg.

Solidariteit verskil ook van Sasol oor die hantering van die vorige skema, Inzalo, en die uitsluiting van pensionarisse van verdere voordele van dié skema.

Solidariteit het ongeveer 6 300 lede by Sasol. Inzalo het op 18 Mei vanjaar ten einde geloop.

Solidariteit het ʼn dispuut by die KVBA aangeteken en aangevoer wit werknemers mag staak om soortgelyke voordele te bekom. Die KVBA het einde Mei bevind dat Solidariteit se dispuut as ʼn saak van gemeenskaplike belang geklassifiseer en dus verder deur die KVBA ondersoek moet word. Solidariteit-lede is kort daarna amptelik toestemming gegee om wettig te staak.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

76 Kommentare

jongste oudste gewildste
Andre

Ek verstaan werklik nie Sasol se motivering om ‘n deel van sy werksmag te benadeel nie. Dit is ‘n besluit wat totaal en al gegrond is op ras. Dit mag tog mos nie? Dink maar ek sal volgende keer verby hou wanneer ek weer brandstof moet ingooi. Nee man Sasol, hoe dan nou. om dan nou blatand te verkondig dat julle blanke werknemers niks vir julle beteken nie. Alle steun aan die werkers en Solidariteit met die voorgenome staking.

Callie

Asb, alle wittes moet die manne ondersteun. Ek verstaan nie. Dit is duidelik rassisme. Hoeklm word SASOL nie hof toe gevat. Die ander opsie om geen Sasol brandstof in te gooi nie is ook daar alhoewel ons weet al die ander petrol maatskappye kry ook petrol van Sasol af.

PW

Ek wag net tot hulle amptelik staak, dan gaan gooi ek maar op ‘n ander plek petrol in tot Sasol bykom in die lewe.

Lindtjies

Die CEO’s van Sasol het klaar gesê daar is nie ‘n manier wat die blanke werknemers daardie R500 000 se aandele gaan kry nie.

Johan

Rassisme deur en deur vanaf Sasol. Van nou af gooi ek brandstof by ander stasies in. Aan watter brandstof stasies verskaf Sasol brandstof, sodat ek hulle ook kan vermy?