Aksieplan vir VSA se staal- en aluminiumtariewe

Argieffoto (Foto: MEIBC, Facebook)

Die vakbond Solidariteit het vandag sy aksieplan bekend gemaak in reaksie op die besluit deur Amerikaanse owerhede om nie die Suid-Afrikaanse staal- en aluminiumbedryf vry te stel van invoertariewe op staal en aluminium nie.

Dit volg ná die Trump-administrasie op 8 Maart 2018 bekend gemaak het dat die VSA, in belang van die nasionale sekuriteit van die VSA, invoertariewe gaan instel op alle invoere van staal en aluminium na dié land.

Volgens Marius Croucamp, adjunkhoofsekretaris van Solidariteit se metaal- en ingenieursbedryf, het die invoertariewe van 25% op staal en 10% op aluminium op 23 Maart 2018 in werking getree. Kanada, Mexiko, Argentinië, Australië, Brasilië, die Europese Unie en Suid-Korea het vrystelling van die tariewe gekry, met voorwaardes.

Croucamp sê voorts dat daar groot kommer heers oor die impak wat die tariewe op die Suid-Afrikaanse staal- en aluminiumbedryf gaan hê. “Ons is bekommerd dat die nuwe tariewe baie werksverliese in die plaaslike bedryf tot gevolg kan hê. Die Suid-Afrikaanse staal- en aluminiumbedryf is al etlike jare lank onder druk as gevolg van internasionale en plaaslike marktoestande asook die storting van staal.”

Plaaslike vervaardigers wat deur die nuwe tariewe geraak word, sluit in ArcelorMittal, South32, Hulamin, Duferco, Cisco en Columbus Stainless. Volgens Croucamp kon die Suid-Afrikaanse regering nie daarin slaag om die Amerikaanse owerhede te oortuig om die plaaslike industrie vry te stel van die invoertariewe nie. “Dit veroorsaak dat plaaslike maatskappye wat staal en aluminium na die VSA uitvoer, se produkte nou baie duurder geword het in die VSA, en dit sal veroorsaak dat maatskappye in die VSA noodgedwonge na goedkoper alternatiewe verskaffers sal soek. Een van die gevolge van die tariewe is dat voorraadvlakke op die wêreldmark verder gestyg het nadat daar alreeds ʼn oormaat voorraad was,” het Croucamp bygevoeg.

Hy voer aan dat alhoewel dit lyk of China die teiken van die VSA se invoertariewe is, kom Suid-Afrika nou ook in die spervuur. “Suid-Afrikaanse maatskappye maak hulle nie skuldig aan stortingspraktyke in die VSA nie,” het Croucamp benadruk. Daar bestaan die moontlikheid dat die optrede van die Suid-Afrikaanse regering by die Verenigde Nasies moontlik ʼn rol gespeel het in die VSA se besluit. In ʼn onlangse verslag deur die VSA se Department of State getiteld Voting Practices in the United Nations 2017 is Suid-Afrika uitgewys as een van die lidlande wat die minste saam met die VSA stem in die VN. Suid-Afrika het ook noue handelsbetrekkinge met China as deel van die BRICS-lande.

Solidariteit se aksieplan sien soos volg daaruit:

1. Solidariteit se skakeling met die Suid-Afrikaanse regering en rolspelers in die bedryf word voortgesit ter ondersteuning van die Suid-Afrikaanse staal- en aluminiumbedryf om die volhoubaarheid van die bedryf te help verseker en só werksgeleenthede en werkers te beskerm. Solidariteit se “SOS-”veldtog (Steun Ons Staal) wat in 2017 van stapel gestuur is, dien as voertuig vir die voorgesette skakeling.

2. Solidariteit gaan ondersteuning bied aan en saamwerk met die departement van handel en nywerheid in verdere pogings om die owerhede in die VSA te oortuig om die Suid-Afrikaanse staal- en aluminiumbedryf van die tariewe vry te stel.

3. Solidariteit gaan plaaslike en Amerikaanse staal- en aluminiummaatskappye wat betrokke is by uitvoertransaksies na die VSA en wat vrystellingsaansoeke aan die owerhede in die VSA voorlê, in die verband bystaan.

4. Solidariteit skakel met verteenwoordigers van die Amerikaanse owerhede in Suid-Afrika met die doel om ʼn beter begrip te kry oor die beweegredes vir die besluit om nie die Suid-Afrikaanse staal- en aluminiumbedryf van tariewe vry te stel nie. Dit is noodsaaklik vir Solidariteit om ook sy invloed uit te oefen in ʼn poging om die Amerikaanse owerhede te oortuig om die besluit oor tariewe te hersien. Solidariteit wil voorts bande bou en verhoudinge versterk.

5. Solidariteit beoog om ʼn versoekskrif aan die Trump-administrasie te rig waarin versoek word dat die VSA se besluit om nie vrystelling die Suid-Afrikaanse staal- en aluminiumbedryf van die invoertariewe op staal- en aluminium te gee nie, hersien word en dat so ʼn versoek in ʼn gunstige lig beskou sal word.

6. Solidariteit gaan met verskeie sleutelorganisasies in die staal- en aluminium bedryf in die VSA wat betrokke was by die 232 ondersoeke skakel met die doel om die saak vir vrystelling van die invoertariewe vir die Suid-Afrikaanse staal- en aluminiumbedryf te bevorder.

7. Solidariteit is besig om ʼn gebeurlikheidsplan op te stel vir gevalle waar die heffing van staal- en aluminiumtariewe werksverliese in Suid-Afrika gaan meebring. Die gebeurlikheidsplan sal uiteensit hoe ondersteuning aan lede en werknemers wat geraak word, gebied sal word.

Solidariteit en belangrike rolspelers in die bedryf het verlede week met die minister van handel en nywerheid, dr. Rob Davis, en amptenare van die departement van handel en nywerheid vergader. Belangrike terugvoering is tydens die vergadering gegee. Solidariteit het ook reeds met verteenwoordigers van die Amerikaanse owerhede in verbinding getree.

“Solidariteit gaan alles moontlik doen om te help om die volhoubaarheid van die plaaslike staal- en aluminiumbedryf te verseker en om werksverliese te probeer voorkom,” het Croucamp afgesluit.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

25 Kommentare

jongste oudste gewildste
kobus

Dis die ANC se skuld nou moet almal swaar kry.nou moet solidariteit planne maak.maar die ANC skep net tot daar niks oor is nie.suid afrika is die volgende zimbabwe

Chris Ws

Daar kom dit nou!’n Bedekte vorm van sanksies!Dis net die begin die’!Donald Trump is slimmer as wat meeste mense dink.

Hoe anders is Solidariteit

Kyk net hoe opbouend anders solidariteit is as die ander vakbonde wat net kan staak.

jaco

eers gaan Solidariteit Amerika to om die SA regering daar amper the “verkla”, en nou dat Amerika vir SA “straf” met die invoertariewe op SA staal, is dit ook nie goed genoeg vir Solidariteit nie.

Gemaskerde Sopbeen

Is dit wat Solidariteit nou voorstel en doen NIE die regering se plig NIE? Betaal ons nie die regering van die dag goeie geld om hierdie pligte uit te voer nie?…………..maar nou moet ons hoor Solidariteit doen die werk?