ANC moet ‘sterk, onbevlekte leiers’ kies

(Argieffoto: Rapitse Montsho/Flickr)

In aanloop tot die ANC se 55ste verkiesing en die parlementêre debat oor pres. Cyril Ramaphosa se lot, het ANC-veterane vandeesweek gesê die party moet “in die beste belang van die land optree”.

Volgens die nasionale taakspan van die ANC se veteraneliga behels dít die vermindering van onsekerheid, ’n bestuurde, deursigtige proses en respek vir die oppergesag van die reg.

“Dit is nou ʼn tyd waar ontwrigtende magte die ANC se pogings tot vernuwing kan destabiliseer en daar moet ten alle koste daarteen gewaak word,” het dr. Snuki Zikalala, sameroeper, gesê.

“Met die benoeming van sy voorkeurkandidate vir leiersposisies in die ANC, was die veteraneliga vasbeslote dat hy geen leier sal ondersteun wat op enige manier bevlek is nie. Ons bly oortuig, meer as ooit, dat vir die ANC om homself te vernuwe en die vertroue van die mense terug te wen, die party geloofwaardige leierskap nodig het saam met ʼn plan van aksie om weer hoop in die ANC te laat opvlam.

“Een van die sleuteltake van die ANC se komende nasionale konferensie is om ʼn nuwe leierskap te verkies.”

Die veteraneliga sê hy glo dat enigeen wat by ongerymdhede betrek word, onder andere deur ʼn kommissie van ondersoek, wetstoepassingsagentskappe en die ANC se integriteitskommissie, nie verkiesbaar moet wees nie.

“In dié verband het die taakspan sy kommer uitgespreek oor die gepubliseerde lys van benoemings vir die komende verkiesing, insluitend die gebrek aan verteenwoordiging, of die keuringsproses afgehandel is, en of die name van kamerade wat benoeming van die hand gewys het, bekend gemaak kan word.

“Daar is ooreengekom dat die veteraneliga dit as ʼn saak van dringendheid met die ANC se nasionale uitvoerende komitee (NUK) sal opneem, ook om te verseker dat die keuringsproses diegene uitsluit wat die organisasie in oneer gebring het.

“Voortspruitend uit die beleidskonferensie is daar wysigings aan die ANC-grondwet wat geskeduleer is vir aanvaarding by die 55ste nasionale konferensie. Die veteraneliga sal hom sterk beywer vir die aanvaarding van hierdie wysigings, veral dié wat die integriteitskommissie konstitusioneel maak en die ANC se dissiplinêre en interne geskilbeslegtingsprosesse versterk.”

Die taakspan sê dié wysigings is ʼn grondslag om die vernuwing van die ANC te bevorder.

“Terwyl die ANC sy 55ste nasionale konferensie nader, glo ons dat die ANC nie net ʼn sterk, onbevlekte leierskap moet kies wat die ANC en die land vorentoe sal neem nie, maar daar moet ook ’n duidelike en doelgerigte plan wees om dit te doen. Om dié rede is die taakspan besig met ʼn plan van aksie wat by die nasionale konferensie voorgelê sal word. “Ons sal ’n beroep op alle benoemde leiers doen om hulself openlik daartoe te verbind om hierdie plan te onderskryf en in te stel deur staatskaping en korrupsie te beveg; deur die bou van modelle vir volhoubare dienslewering op plaaslike regeringsvlak; aktiewe openbare deelnameprosesse; en die herbou van die ANC.”