Die drankbedryf sê hy het verliese van miljarde rande gely. (Foto: pixabay)
Die drankbedryf het ʼn verkoopsverlies van sowat R36,3 miljard gely weens die drie verbodsbepalings wat op alkoholverkope ingestel is sedert Covid-19 in Suid-Afrika uitgebreek het.
Die bedryf bestaan uit onder meer die Suid-Afrikaanse Drankhandelsnaamvereniging (Salba), Vinpro, die Biervereniging van SA (Basa), die nasionale drankhandelaarsvereniging (LTASA) en vervaardigers.
Volgens ʼn studie oor die ekonomiese uitwerking van die besluit is die geannualiseerde BBP-verlies sowat R51,9 miljard, die verlies aan belasting vir die staatskas beloop R29,3 miljard en sowat 200 200 werksgeleenthede in die alkoholwaardeketting is in die weegskaal.
Die bedryf sê die ontleding van die drie verbodsbepalings, insluitende die jongste vyf weke lange verbod tussen 29 Desember en 2 Februarie vanjaar, wys die verwoestende uitwerking van die regering se besluit.
Die uitwerking van die jongste verbod word intussen steeds gevoel en die verkope van alle kategorieë alkohol het gedaal:
- Bierverkope daal met 195 miljoen liter
- Verkope van spiritualieë daal met 10 miljoen liter
- Wynverkope daal met 27,2 miljoen liter
- Verkope van gereed-om-te-drink-drankies daal met 38,1 miljoen liter
Kurt Moorde, uitvoerende hoof van Salba, sê dit is nie net die bedryf en sy werkers wat steier nie, maar die regering ondervind self beduiende inkomsteverliese.
Die verlies van R29,3 miljard aan belasting is sowat 2,3% van die land se algehele belastinginkomste, terwyl die regstreekse verlies aan aksynsbelasting sowat R8,7 miljard beloop – dit is gelykstaande aan 21,2% van die inkomste uit aksynsbelasting.
Volgens die studie is die bedryf 30% van sy beskikbare verkoopsgeleenthede kwyt – drankverkope is tot dusver altesame 15 weke lank verbied – en die bedryf se algehele volumes het met 17% gedaal.
Verbruikers verkies deesdae ook goedkoper alkoholprodukte omdat hul inkomste minder is en stapel voorraad op van drankies wat langer hou en nie verkoeling benodig nie.
Patricia Pillay, uitvoerende hoof van Basa, sê net die bierbedryf is R18 miljard in verkope kwyt weens die drie verbodsbepalings.
“Die werksverliese is uitsonderlik skadelik vir die samelewing en die ekonomie. Meer as 200 220 werksgeleenthede, oftewel 1,2% van nasionale werksgeleenthede in die informele en formele sektor, is in die gedrang,” sê Pillay.
Sy sê die syfers spreek boekdele.
“Die verwoestende ekonomiese uitwerking van die verbod kan nie geïgnoreer word nie en dit kan nie in die toekoms weer ingestel word nie. Ons vra die regering weer om alternatiewe maatreëls te oorweeg om alkoholmisbruik te takel terwyl die inkomste van ʼn beduidende getal mense wat op die bedryf staatmaak, onderhou kan word.”
Die wynbedryf is een van die land se oudste landbousektore en word as ʼn unieke bate bestempel. Die bedryf ondersteun 269 000 werksgeleenthede deur die wynwaardeketting en dra sowat 1,1% tot die BBP by.
“Die verbodsbepalings het die toekoms van die wynbedryf op die spel geplaas,” sê Rico Basson, besturende direkteur van Vinpro.
Plaaslike wynverkope het met 20% (volumegewys) geduik. ʼn Vyf weke lange verbod op uitvoere het daartoe gelei dat 300 miljoen liter wyn uit ʼn voorraad van 640 miljoen liter nie gekontrakteer is nie – en dit juis op die tydstip dat daar met die 2021-oes begin is. Basson sê dit het ʼn enorme dilemma met voorraad veroorsaak en groot druk op stoorfasiliteite geplaas.
Die sosio-ekonomiese uitwerking was ook rampspoedig. Die bedryf het beduidende werksverliese ondervind en dít in gemeenskappe waar een werker dikwels tot ses afhanklikes onderhou.
“Die uitwerking van reisbeperkings op wyntoerisme, wat groot waarde vir Suid-Afrika se toerismebedryf verteenwoordig, tesame met die verbodsbepalings op drankverkope het die wynbedryf op sy knieë gedwing,” sê Basson.
R26 miljard. Baie geld wat ekstra goed kon betaal het.
en minder vrouens en kinders wat “bloei”!
Ek stem 100% saam met jou. Ek was 20 jaar in die polisie en het nooit iemand gesien wat ‘n pakkie 20 rook en huistoe gaan en die gesin aanrand nie.
Ek praat nie rook goed nie en besef dat dit gesondheids gevare inhou maar ek kan nie verstaan dat iemand in ‘n restuarant ‘n bottel wyn mag drink en dan saam met sy gesin in die kar klim en ry nie, kan ons so kortsigtig wees.
Dis my opinie dat, 1. drank nog hoër belas moet word, 2. Alle drank advertensies gestop moet word, 3. Die wettige ouderdom vir die verkoop van drank verhoog moet word na 21, 4. Restuarante en kuier plekke wetlik aanspreeklik gehou moet word as ‘n persoon onder die invloed van drank die perseel verlaat en ‘n voertuig bestuur, en 5. Drank winkels moet toe wees van 13:00 Saterdag tot Maandag.
Drank sit baie meer druk op die gesondheids sektor as tabak.
Hear-hear !!
mooi so , tannie kopdoek………..julle het wel gedaan. DIt is OK in julle oe dat mense van honger doodgaan, solank dit tog net nie covid is nie.
Snaakse bedryf, hierdie drankbedryf. Hoe meer drankmisbruik en die elende wat daarmee gepaard gaan vir vroue en kinders, hoe beter en blyer is die bedryf en hul aandeelhouers.
Vir derduisende mense was dit ‘n werk wat brood en melk op die tafel gesit het en nou is daar niks. Dit was mense se inkomste, ongeag die stigma aan die drankbedryf.
Mooi!!!!!!! Nog so paar miljoen werkloos,die anc se planne werk mooi!!!!!
Dit is vir my die beste. Voor Covid het geen mens gekla oor alkohol verbruik nie. Nou met Covid is dit baie erg as iemand drink. Wonder maar net
Ja drank is nou soos covid se nr 1 wapen wat aansteeklikheid betref.
Dis soos om te kla dat graf grouers af betaal word omdat daar nie genoeg werk vir hulle is nie. Net omdat die drank bedryf baie geld in bring beteken nie dis ‘n goeie ding nie, hoeveel lewens verloor ons elke dag agv drank? hoeveel geld kos drank ons agv misdade ongelukke ens? Maak ons rerig ‘n wins aan die einde van die dag? Soos my voorbeeld , moet ons rerig meer mense dood maak net sodat ander mense ‘n werk kan hê( wat nie ‘n goeie werk is nie) of moet hulle ‘n ander beter werk kry?
Gelukkig is die verbod opgehef. Nou sal ons dronkgatte die land uit die moeilikheid moet suip !!!
Mense jammer maar ek doen my bes om so veel as moontlik te drink om die industrie te help.