Beleërde Unisa vaar nietemin beter wêreldwyd

Die Unisa-kampus in Sunnyside. (Foto: Izelle Jacobs/Unisa)

Unisa het sy posisie op ʼn wêreldranglys vir universiteite verbeter, ondanks groot uitdagings wat die instelling oënskynlik in die gesig staar.

ʼn Herrie woed oor ʼn uitgelekte verslag van ʼn ministeriële taakspan wat bevind het dat Unisa ʼn gekaapte instelling is waar ʼn netwerk van korrupsie inslag gevind het. Sommige van die bevindings in die verslag sluit in dat die raad ontbind en Unisa onder administrasie geplaas word.

Unisa het vroeër gesê hy het die verslag – wat steeds nie amptelik bekend gestel is nie – nog nie gesien nie. Die universiteit het teruggekap en ontken dat Unisa kwansuis kwalifikasies verkoop. Hy het berigte waarin die gehalte van sy programme en navorsing in twyfel getrek word, verwerp en dit as “doelbewus misleidend, kwaadwillig en onakkuraat” bestempel.

Volgens die universiteit word sy kwalifikasies deur die Raad van Hoër Onderwys geoudit en alle kwalifikasies word by die Suid-Afrikaanse Kwalifikasieowerheid geakkrediteer. Bedryfsliggame doen ook assessering van studierigtings.

Unisa sê sy studiemateriaal is beskikbaar vir portuur- en akademiese beoordeling én kritiek. “Uiteenlopende studente, van wie talle nie deur klein, tradisionele universiteite verwelkom word nie, en wat gespesialiseerde studiehulp benodig, voltooi hul studie deur Unisa.”

Unisa het ook sy navorsingsvermoëns en uitsette verdedig.

“Die universiteit verseker sy studente, wêreldwye alumni en lede van die publiek dat hy, nes oor die afgelope 148 jaar, sal voortgaan om beroemde gegradueerdes te lewer wat denkleiers en suksesvolle plaaslike en internasionale leiers van die openbare, private en burgerlike sektor sal word.”

Oor die afhaal van sertifikate sê Unisa buite die konteks van Covid-19 word studente se kwalifikasies gewoonlik in hul hande tydens gradeplegtighede gegee. Dié gradeplegtighede is weens die pandemie opgeskort en Unisa moes minstens 60 000 sertifikate met koeriers laat aflewer. Om die gevare hieraan verbonde te verminder, kon studente hul sertifikate by Unisa se streekkantore afhaal. Dit het ingesluit sertifikate wat sedert 2017 nie afgehaal is nie.

Intussen het Unisa te midde van die herrie die verbetering van sy posisie op die 2022 Times Higher Education Emerging Economies University Rankings verwelkom.

Unisa val in die segment 201-205, terwyl dit in die 2021-indeks in die 251-300-kategorie geval het.

Unisa is een van 11 Suid-Afrikaanse universiteite op die lys. Ander universiteite op die lys is Wits (15), die Universiteit van Kaapstad (16), Stellenbosch Universiteit (24), die Universiteit van KZN (57), die Noordwes-Universiteit (96), die Durban-Universiteit vir Tegnologie (100), die Universiteit van die Wes-Kaap (107), die Universiteit van Johannesburg (117), die Universiteit van Pretoria (153) en die Tshwane-Universiteit vir Tegnologie (351-400).

“Gegewe dat ʼn rekordgetal van 698 universiteite uit 50 lande en streke beoordeel is, is die universiteit trots op sy plek en die beduidende opwaartse beweging in vergelyking met 2021,” sê prof. Puleng LenkaBula, hoof en visekanselier van Unisa.

“Dit is ʼn duidelike aanduiding dat Unisa op die regte pad is as ʼn betrokke universiteit wat ongetwyfeld vakgeleerdheid van gehalte lewer soos gemeet aan wêreldwye standaarde.”