BLF skuldig aan haatspraak

Black First Land First (BLF)-ondersteuners by ‘n optog in 2016. Foto: Jonisayi Maromo / ANA

Die gelykheidshof het pas bevind die politieke party Black First Land First (BLF) se politieke slagspreuk “land or death”, is haatspraak.

Die hof het bevind die BLF moet Suid-Afrikaners binne ʼn maand op die Menseregtekommissie (MRK) se webwerf skriftelik om verskoning vra. ʼn Afskrif van die uitspraak moet boonop aan die direkteur van openbare vervolging gestuur word, vir die moontlike instel van strafregtelike klagte teen die BLF en sy leiers.

Die hof het ook bevind die BLF moet die slagspreuk binne ʼn maand van sy politieke materiaal, sosialemediarekeninge en webwerf verwyder, het die MRK gesê.

Die MRK het die BLF namens ʼn klaer hof toe geneem.

Zanele Lwana, adjunkpresident van die BLF, het by navraag aan Maroela Media gesê die party gaan teen die uitspraak appelleer. “Ons glo die Grondwet beskerm ons en ons glo nié dat die slagspreuk ‘land or death’ haatspraak is nie. Ons glo steeds dis binne ons regte om dit te sê,” het Lwana gesê.

“Ons gaan nie die slagspreuk verwyder nie en ons gaan ook nie om verskoning vra nie.”

Lwana het gesê die party fokus nou op Woensdag se nasionale verkiesing en sê die hofsaak was ʼn manier om mense te probeer verwar oor óf die BLF aan die verkiesing gaan deelneem, of nie.

Sy het gesê die party sal ná die verkiesing die uitspraak behoorlik bestudeer en dan in die gepaste hof appelleer. Sy het gesê die BLF is bereid om die kwessie uiteindelik tot in die konstitusionele hof te beveg.

Volgens haar gaan die BLF ná die verkiesing in die parlement druk plaas op die ANC en EFF om die beleid van onteiening sonder vergoeding deur te voer. “Ons posisie is dat die setlaars na Afrika en Suid-Afrika gekom het en mense tot slawe gemaak het om hulle grond te vat. Ons sal dus baklei om ons grond terug te neem.”

Die Kieshof het verlede week bevind die Onafhanklike Verkiesingskommissie (OVK) het gefouteer deur nie die BLF se registrasie in die Staatskoerant af te kondig nie. Die VF Plus het die hof genader nadat die OVK sy aansoek om die BLF van stembriewe te laat verwyder, van die hand gewys het.

Die VF Plus is sedert Februarie in ʼn stryd gewikkel om die BLF as ʼn politieke party te laat deregistreer. Soos sake tans staan, sal kiesers nog Woensdag in die nasionale verkiesing vir die BLF kan stem.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

53 Kommentare

jongste oudste gewildste
Marinda

Wonderlik. Jammer hulle kan nie die verskoning op ñ paar billboards oor die hele Suid Afrika aanbring nie.

Nicello

Ja wel, “land or death”? Dis dan julle keuse om die dood te kies as julle nie land kry nie.

Thinus Erasmus

Baie HOWE, geen tande………….

Helene

Absolute arrogansie!! Genade!! Ek wil meer sê, maar laat ek liewers stilbly!!

Wat wou...

Ag siestog….hoe arrogant kan julle wees BLF. Maklik om van die dood te praat maar wag dat die paw-paw die fan strike….!