Bloemfonteinse museum mag nie meer wapens uitstal

Vuurwapens wat in ‘n Bloemfonteinse museum uitgestal sou word. (Foto: Verskaf)

Die Nasionale Museum Bloemfontein gaan nie meer voort met die beplande permanente antieke wapenuitstalling nie, al is die projek reeds 80% voltooi. Volgens Veronica van Dyk, DA adjunk-skaduminister van sport, kuns en kultuur, is die projek skielik in Januarie vanjaar stopgesit, nadat Sharon Snell, uitvoerende hoof van die museum, haar afkeer van vuurwapens uitgespreek het.

“Alle beplanning, ontwikkelingsvergaderings, navorsing en konstruksieplanne is voltooi vir hierdie projek, insluitend navorsing van ʼn buitespesialis. Dit is nog net die glaspanele vir die vertoonkaste wat kort. Om dit dus nou te stop gaan lei tot vrugtelose uitgawes,” sê Van Dyk.

Van Dyk sê die vertoonkaste word tans in werkareas gestoor waar dit baie waardevolle ruimte in beslag neem en die werkvloei belemmer.

“Sommige van die museum se uitgebreide versameling vuurwapens is baie waardevol en van groot belang vir versamelaars en vuurwapen-entoesiaste. Die vuurwapens wat gekies is vir die uitstalling weerspieël die geskiedenis en ontwikkeling van vuurwapens,” sê Van Dyk.

“Die museumraad het vir hierdie uitstalling begroot en dit is op die permanente vertoonskedule wat goedgekeur is, geplaas.”

Snell wil klaarblyklik hê die uitstalling moet na die Raadsaal-museum, ʼn satelliet van die Nasionale Museum Bloemfontein, verskuif. Die Eerste Raadsaal-museum is die oudste gebou in Bloemfontein, met ʼn baie spesifieke uitstalling wat die geskiedenis en vestiging van die Vrystaat vertoon.

“Dié museum het egter nie ʼn toepaslike ruimte vir die uitstalling nie en die gewere wat Snell voorstel daar vertoon word, het niks met die geskiedenis van Bloemfontein, die Vrystaat of die Eerste Raadsaal te doen nie. Dit uitstalling hoort in die Nasionale Museumgebou, aangesien dit ʼn baie breër en algemene versameling artefakte en eksemplare voorstel,” sê Van Dyk.

Van Dyk meen Snell verontagsaam die Vuurwapenwet, wet 60 van 2000, sowel as die regulasies van 2004 op die Vuurwapenwet wat van toepassing is op museums, en kan daartoe bydra dat die museum sy akkreditasie of lisensie om die wapens uit te stal, verloor.

“Snell se besluit sal dus ʼn gevaarlike presedent skep vir toekomstige uitstallings in die museum en kan nie geduld word nie.”

 

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

51 Kommentare

jongste oudste gewildste
Tiaan

Dit het niks met die eerste raadsaal te doen nie en hoort in die nasionale museum. Mev Sharon Snell, daar is al reeds baie tyd aan die projek spandeer asook koste, wat is die rede agter jou denke…?

Boer

Laat ek raai, Me Snell wil graag iets oor apartheid uitstal? Johannesburg het reeds twee museums wat merendeels net oor Apartheid gaan en altwee is ewe pateties.

Johan

Dat daar antieke vuurwapens is, is ‘n historiese feit. Of ‘n mens daarvan hou of nie hou nie. Nou wil sekere mense dit ignoreer. Belaglik!

schaun

Piesang republiek demokrasieë n persoon met die naam snell maak n besluit oor die afrikaner se geskiedenis en ons aanvaar dit of dit n nuwe geur van koffie is wat ons van môre af gaan drink………..gee ons asb n onafhanklike tuisland dan vat ons ons geskiedenis en bou ons eie land op waar is die moses om ons hier uit te ly, Dr Groenewald ons hoop is op jou en die VF+.

Karolis

Raak snel ontslae van Snell.