Boek oor SA se ‘gevaarlikste politikus’ maak steeds opslae

Die joernalis en skrywer Pieter-Louis Myburgh. (Foto: Facebook)

ʼn Herrie woed steeds ná die bekendstelling van die ondersoekende joernalis Pieter-Louis Myburgh se boek Gangster State: Unravelling Ace Magashule’s Web of Capture die naweek. In die boek skryf Myburgh daar is invloedryke magte in die regerende party wat alles kan verloor as korrupsie en staatskaping aan die kaak gestel word.

Myburgh skryf Ace Magashule is die man aan die voorpunt van pogings om dít te keer. Hy beskryf Magashule as Suid-Afrika se “gevaarlikste politikus”. Myburgh skryf in die boek daar is in Vrystaatse politieke kringe dikwels na Magashule as “Mr Ten Percent” verwys, glo omdat hy 10% van elke regeringskontrak in die provinsie geëis het. Hy het glo ʼn oog gehou op alle groot en mediumgrootte betalings wat munisipaliteite en provinsiale departemente gedoen het.

“Hy het presies geweet wanneer die meeste groot maatskappye geld by sy regering moes kry en hy sou baie vinnig sy gedeelte eis sodra ʼn betaling gedoen is,” skryf Myburgh.

Die boek delf dieper in Magashule se beweerde duistere transaksies: van sy tyd as struggle-aktivis in die 1980’s, sy magtige bewind as premier van die Vrystaat vir amper ʼn dekade, tot sy opgang as een van die ANC se invloedrykste politici.

Myburgh het deur massas rekords gewerk, dokumente gefynkam en eksklusiewe onderhoude met bronne gevoer om meer te wete te kom van Magashule se verhouding met die berugte Gupta-familie en ander tendermagnate. Hy het ook ondersoek ingestel na regeringsprojekte van miljarde rande wat Magashule se vriende en familie glo verryk het. Myburgh onthul hoe Magashule glo op die nippertjie was om in hegtenis geneem te word kort voor die Skerpioene in die laat 2000’s ontbind is, asook die maniere wat ingespan is om hom in die Vrystaat aan bewind te hou en die pos van sekretaris-generaal van die ANC te verseker.

In die boek skets Myburgh ook ʼn prentjie van Magashule se transaksies met ʼn sakeman wat in 2017 doodgeskiet is, gegrond op ʼn string uitgelekte e-posse en dokumente. Igo Mpambani is in Sandton doodgeskiet, terwyl hy glo op pad was na Bloemfontein. Die polisie het R1 miljoen in sy Bentley gevind. In die boek verbind Myburgh Magashule onder meer met Mpambani se sogenaamde “asbes-oudit” van R225 miljoen wat in die Vrystaat gedoen is.

Myburgh het vanoggend op Twitter gesê daar is diegene in die ANC wat onder meer sommige hoofstukke oor Mpambani in twyfel trek, omdat die bedrae wat hy in die boek noem byvoorbeeld te groot is om by kitsbanke te onttrek. Hy het egter dokumente op sosiale media geplaas om sy bewerings te bewys.

Die ondersoekende joernalis Pieter-Louis Myburgh maak verskeie aantygings in sy jongste boek oor staatskaping en die sekretaris-generaal van die ANC, Ace Magashule.

Maroela Media het vroeër berig die ANC het die boek en berigte oor Magashule veroordeel en die bewerings as fopnuus beskryf. Die ANC sê die aantygings is tipiese Stratcom-styl. Stratcom was ʼn groep binne die destydse apartheidsregering wie se werk dit was om veldtogte met vals inligting te skep. Dit het propaganda, fopnuus, asook smeerveldtogte teen diegene wat apartheid beveg het, ingesluit.

Myburgh het aan Maroela Media gesê die ANC se reaksie was voorspelbaar en dat die regerende party ʼn gewoonte het om ʼn skrywer of verslaggewer aan te val, eerder as om te reageer op die bewerings wat gemaak word.

“Dit is ʼn yl, teleurstellende reaksie. Die ANC kan rondom korruptes laer trek, maar dit (die boek) is ʼn waardevolle bydrae tot die bestryding van korrupsie,” het hy gesê.

Die boek – waaraan Myburgh ʼn jaar lank gewerk het – se bekendstelling is stilletjies gereël uit vrees dat ʼn hofaansoek moontlik ingedien sou word om die verspreiding daarvan te keer.

Myburgh het gesê talle Suid-Afrikaners is “korrupsievoos” en dat hy tot dusver baie goeie reaksie op die boek ontvang het. “Dis ʼn kwessie wat in groot openbare belang is.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

42 Kommentare

jongste oudste gewildste
John

Ons hoop en bid jy oorleef hierdie een. Snaaks dat die waarheid altyd heftige reaksie uitlok en nie leuens nie. Mens sou dink dit moet net andersom werk.

Daan Erasmus

Niks wat ek en jy wat hier skryf sal iets help nie. DIE ANC lees nie Maroela nie. Al sou hul dit lees. Daai mense se verstand is ingestel om dit as leuens af te maak. Niks sal hulle anders laat dink nie.

Irma

Die skrywer sal oë agter sy kop moet hê om veilig te bly.

Ali Swart

Wel gedaan!!!! Die ANC is verrot van die diepste wortels op! Dis tyd dat hulle ware kleure gewys word! Dis lankal nie meer demokrasie nie, maar alles oor hulle geldlus !!!!!!!! Dis is baie hartseer om te sien hoe hulle lieg en bedrieg en weerlose mense blootstel aan verhoogde armoede! Is dit werklik SA se droom …… dis tyd dat die ANC gewys word hulle is nie almagtig nie!!!!

Oom Charles

Manne soos Pieter-Louis en Jacques Pauw is ons land se werklike helde.
Manne met murg en oortuiging.
Heel anders as die sogenaamde ‘struggle-heroes’ (in wese bloot parasitiese fatcats) wat ongesteurd voortgaan om die staatskas te plunder.
Vat vyf, Meneer Myburgh!