Borgtog toegestaan, toe verdwyn moordbeskuldigde

Argieffoto ter illustrasie. (Foto: Unsplash)

’n Zimbabwiese burger wat daarvan aangekla word dat hy die Johannesburgse restauranteienaar Roberto da Silva in Oktober 2018 doodgeskiet het, word gesoek.

Da Silva het die Lusitano-restaurant in Regents Park, Johannesburg, besit.

Nhlanhla Ngwenya is in Januarie vanjaar in die hooggeregshof in Johannesburg op borgtog vrygelaat, nadat hy in 2018 borgtog geweier is. Die oorledene se familie is glo nie van sy borgtog in kennis gestel nie en moes boonop hoor dat die klag van moord teen hom teruggetrek is, nadat die dossier glo verdwyn het.

Ingryping deur AfriForum se privaatvervolgingseenheid het egter verseker dat die klag heringestel word en Ngwenya moes Vrydag weer in die hof verskyn. Hy het egter versuim om op te daag en die hof het sy borgtog finaal verbeurd verklaar.

Volgens die aanklaer van die Nasionale Vervolgingsgesag (NVG) weet die staat nie tans waar die beskuldigde is nie.

Adv. Phyllis Vorster, aanklaer by AfriForum se privaatvervolgingseenheid, sê Ngwenya het onder eienaardige omstandighede borgtog ontvang.

AfriForum se privaatvervolgingseenheid tree op ingevolge ’n waaksaamheidsopdrag namens Cindy da Silva, Roberto se vrou. Da Silva het die eenheid om hulp genader, nadat sy vroeër vanjaar gehoor het die beskuldigde is op borgtog vrygelaat en dat die NVG hom ook nie meer vir moord gaan vervolg nie omdat die dossier glo weggeraak het.

Ngwenya is in Desember 2020 in hegtenis geneem en die NVG het aanvanklik aangedui dat hulle die beskuldigde gaan vervolg op ’n klag van moord en drie klagte van gewapende roof.

“Die NVG het Da Silva egter aan die begin van die jaar in kennis gestel dat Ngwenya nie meer van moord aangekla gaan word nie, ondanks beeldmateriaal wat daarop dui dat Ngwenya al twee keer vantevore by die restaurant ingebreek en kontant geroof het. Tydens die derde rooftog is Roberto doodgeskiet,” sê Vorster.

Dit het toe ook aan die lig gekom dat Ngwenya intussen ’n appѐl teen die borgtoguitspraak ingedien het en in Januarie op borgtog vrygelaat is. Vorster sê die NVG het die familie geensins hiervan in kennis gestel nie.

“AfriForum se privaatvervolgingseenheid het aangedring op ’n ondersoek na hoe Ngwenya, gegewe die feit dat hy ’n onwettige immigrant was wat van moord aangekla word, enigsins borgtog gekry het.”

Volgens Vorster het dit uit hierdie ondersoek geblyk dat die beskuldigde gedurende die feestyd in Desember verlede jaar ’n borgtogappèl ingedien het en op grond van “nuwe feite” op borgtog vrygelaat is in Januarie vanjaar.

Die eenheid het toe vertoë aan die Direkteur van Openbare Vervolging in Gauteng (DOV) gerig dat die klag van moord heringestel moet word en het ook bewysmateriaal aan die NVG beskikbaar gestel. Daarna het die NVG weer besluit om vervolging in te stel en is die dossier ook sommer “gevind”.

“Ons sal nou vir Cindy bystaan om toe te sien dat die polisie die nodige stappe doen om te sorg dat die beskuldigde opgespoor (en, indien nodig, uitgelewer) word sodat die verhoor kan voortgaan. Die NVG se onbeholpe hantering van hierdie saak het van meet af aan probleme veroorsaak. As die privaatvervolgingseenheid nie by die saak betrokke geraak het nie, sou al die klagte teen die beskuldigde heeltemal verdwyn het. Watter boodskap stuur dit uit aan die slagoffer se familie – dat hulle nie geregtigheid verdien nie? Die NVG en polisie se taak is om die gemeenskap te beskerm en toe te sien dat skuldiges aan die pen ry, maar ons sien al hoe meer hoe hierdie verpligtinge versaak word.”