Borgtog vir Glencoe-boer ná maande agter tralies

(Argieffoto: pixabay)

Die KwaZulu-Natalse boer wat byna ses maande in aanhouding deurgebring het nadat hy verlede jaar op aanklag van moord in hegtenis geneem is, is Dinsdag eindelik borgtog toegestaan.

Garth Simpson (67) is vanoggend borgtog in die hooggeregshof in Pietermaritzburg toegestaan nadat hy aanvanklik in Oktober borgtog in die landdroshof op Glencoe geweier is.

Simpson staan tereg op aanklag van moord nadat hy glo die 17-jarige Qiniso Dlamini in ʼn struweling op sy plaas in die omgewing van Dundee doodgeskiet het.

Daniël Eloff, Simpson se regsverteenwoordiger, meen sy kliënt het “ses maande te lank” in aanhouding deurgebring.

Regter Poyo Dlwati het vanoggend in die hooggeregshof beslis dat die landdros gefouteer het toe hy Simpson se aansoek van die hand gewys het op grond daarvan dat hy ’n gevaar vir die samelewing sou inhou en dat hy weens sy eie veiligheid eerder in aanhouding moes bly.

Volgens Dlwati kom dit in ’n video van die beweerde misdaad prima facie voor dat Simpson uit selfverdediging opgetree het en dus nié ’n gevaar vir ander inhou nie. Die regter het ook bevind dat die landdros versuim het om daarop ag te slaan dat Simpson ’n ander adres voorgelê het waar hy hangende die saak kan tuisgaan en dus nie in enige gevaar verkeer nie.

Van links: Jaques Broodryk Carl Simpson (Garth se broer) en Kerri Simpson (Garth se dogter) by die hof. (Foto: AfriForum)

Op die vraag oor hoe dit nou met Simpson gaan, het Eloff geantwoord dat dit uiteraand beter gaan ná die uitspraak. Sy familie was veral bekommerd oor sy gesondheid in aanhouding aangesien hy aan onder meer hoë bloeddruk ly.

Simpson sal nou weer op 15 Maart in die Glencoe-landdroshof moet verskyn.

Jacques Broodryk, AfriForum se veldtogtebestuurder, sê die burgerregteorganisasie verwelkom die hof se besluit om eindelik borgtog toe te staan.

AfriForum staan Simpson met regshulp by “omdat dit lyk of Simpson ’n baie goeie verweer het en moontlik suksesvol sal wees in sy verdediging, mits hy goeie regshulp het tydens die verhoor en nie die slagoffer word van nou al holruggeryde politieke en rasgebaseerde aantygings nie.

“Simpson is nie ’n bedreiging vir enigiemand nie, het geen kriminele rekord nie en het uit selfverweer opgetree. Howe moet besluite neem gebaseer op regsbeginsels en nie politiek nie. Die feit dat ’n lewe verloor is tydens die voorval is tragies, maar hoe die saak tot dusver hanteer is, is ’n growwe onreg wat reggestel moet word,” sê Broodryk.

Lees al Maroela Media se berigte oor die skietery op Simpson se plaas hier.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

27 Kommentare

jongste oudste gewildste
marius

Ras ongeregtigheid .punt .

Misky

Hoogtyd en bly vir die man. Werk solank aan daai eis teen die staat vir borgtog weier in eerste plek. Absoluut absurd en pure politiek wat weerspieël.

Cherokee

Die regter het ooglopend nie slegs die boer nie, maar ook die magistraat verhoor. Die landdros behoort nie skotvry hiervan weg te stap nie.

AW

Dankbaar !!

Sterkte !!

JohanR

Hy is wit en ‘n boer, soe wat anders kan mens verwag!