Bushiri gaan by Malawiese owerhede aanmeld

Shepherd Bushiri. (Foto: Facebook)

Die voortvlugtende Shepherd Bushiri sê hy gaan Woensdag by die polisie in Malawi aanmeld om sy besluit om uit Suid-Afrika na Malawi te vlug, te verduidelik.

In ʼn verklaring hou die omstrede selfverklaarde profeet vol dat hy nie ʼn regverdige verhoor in Suid-Afrika gaan kry nie. Bushiri en sy vrou, Mary, asook hul medebeskuldigdes, staan tereg op aanklagte van onder meer bedrog en geldwassery wat sowat R102 miljoen beloop.

Die Bushiri-egpaar het verlede week, ten spyte van streng borgtogvoorwaardes, dit steeds reggekry om Suid-Afrika oënskynlik ongesiens te verlaat.

“Ek is onskuldig tot ek skuldig bevind word. In hierdie stadium het geen hof ter wêreld my nog skuldig bewys nie. Ek word dalk onderwerp aan ʼn media- en openbare verhoor, maar ek staan by my onskuld tot ek skuldig bevind word,” het Bushiri in ʼn verklaring aan “die Suid-Afrikaanse Ontwikkelingsgemeenskap (SAOG), die Afrika-vasteland en die wêreld” gesê.

Bushiri sê hy het nie net na Malawi gegaan om politieke ingryping te vra nie, maar ook om geregtigheid ingevolge Malawi se grondwet te vra. “Ek glo vas in die Malawiese grondwet omdat dit elke burger, ook vir my en my vrou, beskerm.”

Bushiri hou vol hy en sy vrou gaan nie ʼn regverdige verhoor kry nie.

Hy sê hy en sy vrou het elk vyf paspoorte, waarvan een ʼn diplomatieke paspoort en een ʼn gewone paspoort is. “Ons het al die paspoorte aan die ondersoekbeampte in Suid-Afrika oorhandig.

“Omdat ons weens die werk van ons bediening gereeld reis, is die ander paspoorte vol. Hulle bevat egter steeds internasionale visums en ons het dit dus gehou. Daar is niks sinister daaromtrent nie. Selfs die departement van immigrasie in Malawi het daarvan getuig,” lui Bushiri se verklaring.

Hy sê voorts Aaron Motsoaledi, Suid-Afrika se minister van buitelandse sake, het die egpaar se vrese versterk dat hulle nie hier ʼn regverdige verhoor gaan kry nie.

Motsoaledi het Dinsdag aan die parlement se portefeuljekomitee oor binnelandse sake gesê sy departement was daarteen gekant dat borgtog aan die Bushiri-egpaar toegestaan ​​word. Die minister het gesê sy departement het maande lank geweet dat die egpaar se identiteitsdokumente bedrieglik is en het dit ook so aan die polisie deurgegee tydens die egpaar se uitgerekte borgtogverhoor.

Bushiri sê Motsoaledi se opmerkings het geraak aan die meriete van die hangende verhoor en voer aan die minister was “teleurgesteld toe ons regte deur die hof beskerm is”.

“Die minister gaan aan deur te sê ek en my vrou het elk vyf verskillende paspoorte. Die indruk word geskep dat dit paspoorte met verskillende name en besonderhede is. Weereens is dit ʼn kwessie wat voor die hooggeregshof in Suid-Afrika is,” het Bushiri gesê.

“Die stelling deur die minister versterk my vrees dat ek nie in Suid-Afrika ʼn regverdige verhoor gaan kry nie.”

Hy sê ook die minister het mense doelbewus en onregverdig probeer mislei.

Intussen het die Valke gesê ʼn tweede lasbrief vir die inhegtenisneming vir die Bushiri-egpaar is uitgereik. Die twee is in hierdie stadium in minstens twee strafsake gewikkel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

5 Kommentare

jongste oudste gewildste
Genis

Genis wil ook net noem, die hele Afrika is korrup en kyk so na mekaar… Vinkel en Koljander kom in my gedagtes op..

Nette

So moeg vir hierdie gesiggie…As JY meneer self-proclaimed profeet soooo onskuldig is why run?

Persheks Adri

Pffft nou hoekom 5 paspoorte nog steeds? As 1 vol is reis jy nie met al 5 nie duh. Iets anders is hier aan die gang al is jy ‘n sogenaamde pastoor…

Daleen

Kry die “profeet” nou ‘n voorsmakie van hoe witmense in Suid-Afrika voel oor die regstelsel.

Anel

Sovêr ek weet is die misdade in Suid Afrika gepleeg. Dan moet hulle mos hier verhoor word. Jy kan nie in ‘n land van misdaad aan gekla word wat in’ ‘n anderland gepleeg is nie. Lekker bang om terug te kom. Kry vir julle.