Coligny-twee hoor oor borgtog

Pieter Doorewaard en Pillip Schutte tydens hul borgtogaansoek in die hooggeregshof in Mmabatho. (Foto: Jhua-Nine Wyrley-Birch)

Pieter Doorewaard en Phillip Schutte van Coligny is Vrydag in die hooggeregshof in Mmabatho borgtog toegestaan.

Regter Ronnie Hendricks het Doorewaard en Schutte op borgtog van R20 000 elk vrygelaat. Die twee se borgtogaansoek is verlede week Donderdag aangehoor waarna uitspraak eers voorbehou is.

Dit kom nadat die mans wat in Maart vanjaar aan die moord op die tiener Matlhomola Moshoeu skuldig bevind is, vroeër spesiale verlof gekry het om direk by die appèlhof in Bloemfontein te appelleer teen hul skuldigbevinding.

Die mans se regspan, onder leiding van adv. Barry Roux, het die appèlhof suksesvol versoek om verlof tot appèl te kry nadat die hooggeregshof in Mmabatho in Maart vanjaar geweier het om verlof tot appèl in dié saak toe te staan.

AfriForum het besluit om Doorewaard en Schutte se appèlaansoek te finansier nadat Bonakele Pakisi, die enigste ooggetuie in die moordsaak, teenoor vier mense erken het dat hy in die hof gelieg het. Hy het vroeër getuig dat hy gesien het hoe Doorewaard en Schutte die tiener vermoor.

“Ons weet die mans is onskuldig en hulle verdien nie om ’n dag langer in die gevangenis te wees nie. Hulle is reeds 13 maande in aanhouding en dit is 13 maande te lank,” het Kallie Kriel, uitvoerende hoof van AfriForum, gesê. Kriel het gesê AfriForum sal aanhou om die mans se regskoste vir die appèlproses te betaal.

Pieter Kartsen. (Foto: Jhua-Nine Wyrley-Birch)

Pieter Karsten, Doorewaard se oom, het na die uitspraak gesê hulle is ontsettend verlig en dankbaar.

“Daar is geen manier dat die duisternis van ’n leuen die lig van die waarheid sal oorskadu nie. Ons glo en ons gaan aanhou glo.”

Ds. Tewie Pieters van Coligny, wat ’n leidende rol gespeel het om versoening en verdraagsaamheid in die gemeenskap te bewerkstellig ná die voorval, het buite die hof gesê daar is met ’n pad van versoening in die dorp begin en dit gaan voort in daadwerklike projekte wat begin is om die gemeenskap bymekaar te bring.

Oor die mans se borgtog het hy gesê: “Ons het van die begin af in hul onskuld geglo. Dit is jammer en tragies dat die regsproses die pad moes loop waar ’n hof in Bloemfontein dit anders sien as die een in Mahikeng.”

Hy het gesê die feit dat die mans nou borgtog gekry het, dui daarop dat daar steeds ’n moontlikheid is dat daar geregtigheid in die regstelsel is.

Adv. Barry Roux tydens die mans se borgtogaansoek in die hooggeregshof in Mmabatho. (Foto: Jhua-Nine Wyrley-Birch)

Roux het tydens die borgtogaansoek aangevoer die mans moet op borgtog vrygelaat word omdat twee regters van die appèlhof aangedui het dat daar ’n redelike kans is dat die hof tot die beslissing kan kom dat Pakisi se getuienis nie op standaard is nie en dat die mans moontlik ontslag kan kry.

Hy het aangevoer dit is in die belang van geregtigheid dat die mans hangende die uitspraak op borgtog vrygelaat word.

Hy het voorts gesê daar is geen rede om te aanvaar dat die mans nie aan voorwaardes vir borgtog sal voldoen nie, of ’n vlugrisiko is.

Die staat het aangevoer die mans is skuldig bevind op grond van Pakisi se getuienis.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

41 Kommentare

jongste oudste gewildste
sdp

Ai dankie tog

AW

Dié mens besef nié hoe jou leuns ander se lewens kan en sal verwoes nie !!

Wurmpie

Baie bly vir hulle. Hoop die een wat so gelieg het gaan nou bietjie sit

Vonkprop

Nou wat word nou van Bollemakiesie wat gejok het en hierdie ouens se lewens verwoes het?

Liggie

Dit is die wonderlikste nuus sover. Ons is so bly saam met hulle families en geliefdes.