Covid-19-statistieke: Net 19 nuwe gevalle hiér

‘n Gesondheidswerker berei ‘n dosis van die J&J-entstof voor.
(Photo by Phill Magakoe/AFP)

Limpopo en Noordwes het Vrydag elk net 19 nuwe gevalle van Covid-19 aangeteken. Gauteng (163) het die meeste nuwe gevalle aangeteken, gevolg deur die Wes-Kaap (64) en KwaZulu-Natal (59). Die Wes-Kaap en KwaZulu-Natal het steeds die meeste aktiewe gevalle, met meer as 5 000 mense in elk van dié provinsies wat tans Covid-19 onder lede het. In die Oos-Kaap het net 298 mense tans die virus.

Volgens die departement van gesondheid se nasionale statistieke is 475 nuwe Covid-19-gevalle Vrydag in Suid-Afrika aangeteken. Dit verteenwoordig ʼn positiwiteitskoers van net 1,7%. Hoewel dit minder nuwe gevalle as Donderdag is, is dit ietwat meer as die gemiddelde daaglikse nuwe gevalle die afgelope week, wat 387 is. Nog 47 sterftes is aangeteken en 34 mense is in die hospitaal opgeneem.

Altesaam 183 074 mense is Vrydag teen Covid-19 ingeënt. Minstens 20 382 hiervan was kinders tussen 12 en 17 jaar oud, wat beteken dat amper 121 000 kinders reeds een dosis van die entstof ontvang het.