DA kla ANC aan van rampokkery

Mmusi Maimane, leier van die DA. Foto: DA/Twitter

Die ANC is nie meer ʼn politieke party nie, maar eintlik net “ʼn kriminele geldmaakskema” wat belastingbetalersgeld gebruik om hulself deur rampokkery te finansier, meen die DA.

Daarom het die DA-leier, Mmusi Maimane, en twee DA-LP’s, Natasha Mazzone en adv. Glynnis Breytenbach, die nasionale direkteur van openbare vervolgings, adv. Shamila Batohi, versoek om die ANC op ʼn aanklag van rampokkery en die bedryf van ʼn kriminele organisasie te ondersoek.

Maimane het vanoggend aan die parlementêre perskorps gesê dit help nie om aanklagte by die polisie in te dien nie want dit loop op niks uit nie.

Volgens Maimane is die polisie onwillig om dit te ondersoek omdat dit as ʼn loopbaanbeperkende ondersoek gesien word. Dus is Batohi genader.

Volgens Maimane het die DA reeds hard teen korrupsie en staatskaping geveg, met aanklagte oor onder meer die strategiese wapentransaksie, die VBS-fiasko, Bosasa, die gebeure voor die Zondo-kommissie van ondersoek na staatskaping en die bevindings van die Nugent-kommissie van ondersoek na wanpraktyke by die Suid-Afrikaanse Inkomstediens ingedien, maar min gebeur.

“Dit is duidelik dat die rampokkers in die ANC te werk gaan met ʼn vierpuntplan: Eerstens: stig ʼn politieke party. Tweedens: Kaap die staat. Derdens: Maak seker sommige maatskappye kry onwettige kontrakte wat groot bedrae van die belastingbetaler inbring. Vierdens: Kry daardie maatskappye om die party te finansier,” het Maimane gesê.

Die DA het omvattende dokumentasie ter stawing van sy standpunt ingedien.

Voorbeelde sluit in die maatskappye McKinsey, Trillian, verskeie Gupta- gekoppelde maatskappye, die suiwelplaas by Vrede in die Oos-Vrystaat en Eskom, sowel as die gedrag van individue soos oudpres. Jacob Zuma en sy seun, Edward.

Mazzone het aangedui dat Eskom byvoorbeeld deur sy steenkoolaankope glo rampokkery gepleeg het en dat die ANC daarby baat gevind het.

Breytenbach het aangevoer die ANC gebruik belastingbetalersgeld om die ANC te bevoordeel eerder as om dienste te lewer. Sy meen Batohi moet die ondersoek prioritiseer omdat dit die sambreelsaak oor staatskaping verteenwoordig.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

38 Kommentare

jongste oudste gewildste
DG

Ek hou daarvan, dit is egter net verkiesings-foefie. Ek hoop iets kom daarvan maar is maar skepties dat enige iemand genoeg tande het om iets te doen..

BlinkStephaans

Dis baie oulik moesie om hier kort voor die verkiesing n geraas te maak… al die ander partye doen maar dieselfde… en al is jou punte hoe gegrond ek het nie veel hoop dat dit enigsins êrens heen sal gaan. Adv. Bathoi moet nog haarself bewys… en dié een is bietjie van n warm patat.

Dafer

Die rampokkery is waar, maar ek dink die klaers het nie regtig erns met die saak nie. Ek dink die saak sal slaag by die wereld hof.

Gert van Wierdapark

Verkeerde klag van Rampokkery. Moet eintluk wees Verraad en Sabotasie!

Adam

Maimane is hier vir ‘n slag op die regte spoor, maar hoekom noem hy nie sommer die ANC se besigheidarm, ChancellorHouse, by die naam nie? Vir die ANC draai absoluut alles om selfverryking vir ‘n bevoorregte groep.