Departement slaan vure dood oor ‘inent’ van gr. 1’s

‘n Kind se inentingskaart. Die departement het om verskoning gevra vir die verwarring. (Foto: Maroela Media)

Die Gautengse departement van onderwys het ʼn verduideliking gegee oor die inentingskaart wat een van die vereiste dokumente is vir voornemende gr. 1’s om by skole in te skryf.

Groot woede het geheers nadat daar na ʼn “inentingskaart” verwys is in die departement se aanlyn inskrywingsvoorlegging vir volgende jaar.

Volgens die departement verwys dié inenting nie na die entstof teen Covid-19 nie.

“Dit verwys na ʼn immuniseringskaart wat ʼn rekord van immunisering en die kind se groeikoers bevat wat aan ma’s gegee word wanneer hulle baba gebore word. Dit word gebruik om die ontwikkeling van die kind tot op vyf jaar oud te monitor,” sê Steve Mabona, woordvoerder van die departement.

“Ons is bewus van die verwarring wat moontlik geskep is deur die gebruik van die term inenting pleks van immunisering. Hoewel die terme verwant is deurdat albei inenting/inspuiting betrek, stem ons saam dat dit verskillende betekenisse dra, veral binne die konteks van die pandemie wat ons tans in die gesig staar.”

Volgens die departement moet ouers of voogde wat hul kinders in fase 2 vir gr. 1 inskryf, dié immuniseringskaart indien.

Panyaza Lesufi, LUR vir onderwys in Gauteng, het op Twitter verskoning gevra vir die verwarring.

“Kinders in ons land word in elk geval nog nie [teen Covid-19] ingeënt nie. Verskoning vir die verwarring.”

Maroela Media het vroeër berig Gauteng se aanlyn skoolaansoeke vir volgende jaar open binne die volgende nege dae, maar net vir ʼn beperkte groep leerders.

Die proses geskied vanjaar in twee fases nadat die departement se vorige stelsel groot probleme veroorsaak het.

Slegs gr. 7-leerders wat tans in ’n openbare skool in Gauteng is en wie se besonderhede reeds op die departement se aanlyn stelsel is, sal dus van Dinsdag 10 Augustus om 08:00 aanlyn aansoek kan doen vir die hoërskool van sy of haar keuse.

Aansoeke vir dié leerders sluit op 3 September om middernag.

Aansoeke vir alle gr. 1- sowel as gr. 8-leerders wat nie tans in ’n openbare Gautengse skool is nie, sal op 13 September om 08:00 open en op 8 Oktober om middernag sluit.

Die plasing van fase 1-leerders sal tussen 15 Oktober en 30 November plaasvind terwyl fase 2-leerders tussen 15 November en 30 November in skole geplaas sal word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

29 Kommentare

jongste oudste gewildste
Schalk

Die klomp lieg so maar eintlik toets hulle net die water en dit sal een of ander tyd weer ge-probeer word van ‘n ander hoek.

Mallie

Wie is so stupid om sulke misverstande toe te laat.

Tanniepetoors

Is dit nou Kubane wat die nuwe vorms ontwerp het of is dit maar net ‘n geval van algemene onkunde in die departement?

ONTPS

Dis nou om die dam onder die eend uit te ruk, ek het verstaan waarna verwys word, veral omdat die personeel by die kliniek waar die immuniserings toegedien word jou voortdurend herinner daaraan dat die skool dié kaart sal wil sien…

maggie

Die kinders se immuniseringskaarte was nog al die jare ‘n vereiste. Ek mos my kinders se kaarte inhandig 20 jaar gelede al toe hulle skool begin het